Oferta e ish-deputetit të Ramës: 5 mijë euro për deputetin në kosh

Ish-deputeti Eduart Ndocaj ka ironizuar kryeministrin Edi Rama pas vendimit për shpërblimin me 2,500 euro të efektivëve të Policisë së Shtetit që u angazhuan në vijën e parë gjatë protestave. Përmes një videoje të publikuar, ai ka përdorur të njëjtën logjikë të shpërblimit financiar për të përcjellë një mesazh thumbues ndaj deputetëve dhe ministrave shqiptarë.

Në reagimin e tij, Ndocaj e ka çuar ironinë një hap më tej, duke propozuar shuma edhe më të larta për ata që, sipas skenarit të tij provokues, do të hidhnin në koshin e plehrave përfaqësues të politikës.

“Unë dua t’ju ofroj 5 mijë euro, kush hedh një deputet të Partisë Socialiste apo të Partisë Demokratike në koshin e plehrave. Ju garantoj se do keni 5 mijë euro për çdo deputet në koshin e plehrave, 10 mijë euro për çdo ministër në koshin e plehrave”, shprehet ish-deputeti në video.

Deklarata është ndërtuar si një parodi e skemës së shpërblimeve të njoftuar nga kryeministri, duke e kthyer vendimin për efektivët e policisë në objekt të kritikës ndaj klasës politike. Me këtë krahasim, Ndocaj synon të vërë në diskutim mënyrën se si qeveria shpërblen angazhimin e forcave të rendit në një periudhë të shoqëruar nga protesta dhe tensione politike.

Reagimi vjen në një klimë të ndezur politike, ku përballja mes protestuesve dhe institucioneve, si dhe qëndrimet e qeverisë për menaxhimin e situatës, kanë nxitur debate të forta publike.

Deri më tani, deklarata e Ndocajt mbetet një reagim ironik ndaj vendimit për shpërblimin e policëve, përmes të cilit ai ka vënë në shënjestër përfaqësuesit e të dy krahëve kryesorë të politikës shqiptare.