Dr. Arben Muçaj merr mandatin 2025–2030

Sot është përmbyllur procesi zgjedhor në Urdhrin e Stomatologut të Shqipërisë, pas mbylljes së votimeve në të gjitha 7 rajonet e vendit dhe formimit të Asamblesë Kombëtare, në përputhje me statutin dhe vendimet gjyqësore në fuqi.

Në mbledhjen përfundimtare të Asamblesë Kombëtare, me votim të fshehtë, u zgjodh Presidenti i ri i USSH për mandatin 2025–2030: Dr. Arben Muçaj, Kirurg Oro-Maksilofacial dhe Doktor i Shkencave.

Zgjedhja e tij vjen pas përfundimit të mandatit të ish-presidentit Nikoll Deda, i cili ka shërbyer për dy mandate të plota në krye të institucionit. Me këtë proces, Urdhri i Stomatologut të Shqipërisë rikthehet në normalitetin institucional, duke hapur një kapitull të ri për funksionimin demokratik dhe transparent të strukturave të tij.

Në fjalën e tij pas zgjedhjes, Dr. Muçaj deklaroi:

“Urdhri i Stomatologut deri tani ka funksionuar si një strukturë që u jepte urdhra dhe penalizime stomatologëve. Nga sot e tutje, Urdhri do të jetë avokati, mbrojtësi dhe përfaqësuesi i tyre, jo autoritet ndëshkues.”

Ai shtoi se fokusi i mandatit të tij do të jetë tek:

• rritja e transparencës,

• forcimi i unitetit profesional,

• modernizimi i strukturave,

• dhe mbrojtja e të gjithë stomatologëve të Shqipërisë.

Procesi zgjedhor u zhvillua në mënyrë të rregullt, të ligjshme dhe respektoi plotësisht procedurat statutore.