Paraqitet në Gjykatën Kushtetuese për të kundërshtuar shkarkimin

Kryebashkiaku i pezulluar i Tiranës, Erion Veliaj, pritet të jetë sot i pranishëm në seancën publike që do të zhvillohet në Gjykatën Kushtetuese. Seanca do të shqyrtojë ankimin e tij kundër vendimit të qeverisë për ta shkarkuar nga detyra.

Gjykata Kushtetuese, më 9 tetor, i dërgoi Veliajt një njoftim zyrtar duke i dhënë mundësinë të zgjidhte nëse dëshironte të merrte pjesë personalisht në seancë. Katër ditë më vonë, më 13 tetor, institucioni informoi edhe Drejtorinë e Përgjithshme të Burgjeve për datën dhe orën e zhvillimit të seancës plenare publike, duke kërkuar marrjen e masave të nevojshme në rast se Veliaj shprehte dëshirën për të qenë i pranishëm.

Ankimi i Veliajt në Gjykatën Kushtetuese është depozituar më 25 shtator, pas vendimit të qeverisë për shkarkimin e tij, një vendim që u propozua fillimisht nga Këshilli Bashkiak i Tiranës. Ndërkohë, më 1 tetor, Presidenti Bajram Begaj dekretoi mbajtjen e zgjedhjeve të pjesshme për Bashkinë e Tiranës, por ky dekret u pezullua nga Gjykata Kushtetuese me një vendim të përkohshëm, deri në përfundimin e shqyrtimit të çështjes.

Kjo seancë shënon daljen e parë publike të Erion Veliajt që prej arrestimit të tij më 10 shkurt të këtij viti. Ai ndodhet në paraburgim pas vendimit të Gjykatës së Posaçme, e cila miratoi kërkesën e SPAK për masën “arrest me burg”, nën akuzën për korrupsion të kryer në disa raste në bashkëpunim.