Erion Veliaj lë qelinë dhe niset drejt Tiranës (VIDEO)

Ish-kryebashkiaku i Tiranës, Erion Veliaj, ka lënë mëngjesin e sotëm ambientet e paraburgimit në Durrës. Ai është shoqëruar nën masa të rrepta sigurie nga një furgon i policisë së burgjeve drejt Gjykatës Kushtetuese në Tiranë, ku do të mbahet seanca publike mbi ankimimin e tij kundër vendimit të qeverisë për shkarkimin nga detyra.

Seanca pritet të zhvillohet paraditen e kësaj të premte, me relatore gjyqtaren Sonila Bejtja. Gjykata do të shqyrtojë kërkesën e Veliajt për shfuqizimin e vendimit të Këshillit të Ministrave që miratoi shkarkimin e tij, si dhe dekretin e firmosur nga Presidenti Bajram Begaj për zhvillimin e zgjedhjeve të parakohshme në Bashkinë e Tiranës.

Më herët, Gjykata Kushtetuese kishte vendosur pezullimin e përkohshëm të dekretit presidencial, në pritje të një vendimi përfundimtar mbi ligjshmërinë e shkarkimit. Vetë Kushtetuesja kishte kërkuar që Veliaj të ishte i pranishëm në seancë, e cila do të jetë publike.

Ky është dalja e parë e ish-kryebashkiakut nga qelia që prej arrestimit të tij në shkurt të këtij viti, pas hetimeve të SPAK për veprat penale të korrupsionit në bashkëpunim.