Flamur i ISIS dhe automatikë, dalin pamjet nga aksioni në Orosh

Pamjet e siguruara tregojnë momentet e aksionit të forcave të rendit në fshatin Orosh të Pukës, ku dy të rinj u izoluan për orë të tëra në një banesë të braktisur dhe kundërshtuan me armë thirrjet e Policisë për t’u vetëdorëzuar.

Sipas burimeve zyrtare, bëhet fjalë për Erzen Ukën dhe Julian Cumrakun, të cilët u ngujuan brenda banesës dhe refuzuan të dilnin, duke detyruar Policinë e Pukës të kërkonte mbështetje nga Forcat Speciale Renea, strukturat e DVP Shkodër dhe Drejtoria e Antiterrorit.

Qëlluan ndaj Renea-s sapo u kërkua dorëzimi

Policia njofton se në momentin që Renea u bëri thirrje të dalin, nga brenda banesës u qëllua me armë zjarri në drejtim të forcave speciale, duke rrezikuar jetën e tyre. Banesa u rrethua menjëherë, ndërsa operacioni mori emrin “OROSHI”.

Pas 12 orësh përpjekjesh, thirrjesh të njëpasnjëshme dhe negociatash të vazhdueshme, të rinjtë u dorëzuan falë ndërhyrjes së të afërmve, të cilët luajtën një rol kyç për mbylljen e operacionit pa përdorur forcë.

Në momentin e dorëzimit, Erzen Uka kishte një plagë tejshpuese në kofshë dhe u transportua menjëherë në Spitalin Rajonal Shkodër, ku ndodhet jashtë rrezikut për jetën.

Arsenal armësh dhe flamur i ISIS brenda banesës

Gjatë kontrollit të banesës së braktisur, policia gjeti dhe sekuestroi një sasi të konsiderueshme armësh dhe materialesh luftarake. Midis tyre:

4 armë automatike
1 armë pistoletë
17 granata dore difensive
Municion luftarak
Kapsolla detonatore elektrike
Fitil zjarrpërcjellës për shpërthimin e lëndëve plasëse
Dy gëzhoja
Një flamur i Organizatës Terroriste ISIS, i vendosur në mur ndërmjet armëve

Autorët, të dënuar më parë

Dy të arrestuarit kishin precedentë penalë:

E. U., 35 vjeç, i dënuar më parë për “Nxitja e urrejtjes dhe grindjeve”
J. C., 34 vjeç, i dënuar për “Vjedhje” dhe “Kanosje”

Akuza të rënda për të dy

Materialet i janë referuar Prokurorisë së Shkodrës për disa vepra të rënda penale, përfshirë:

Nxitja dhe propaganda për kryerjen e veprave me qëllime terroriste
Prodhimi i armëve luftarake
Mbajtja pa leje e armëve shpërthyese dhe municionit
Kundërshtimi i punonjësve të Policisë