Fundi pa lavdi i Metës dhe këmba zvarrë për Erion Veliajn

Përditësuar më 21 October 2024, 23:37

 Naim Noka

Arrestimi  i Ilir Metës shënon jo thjesht fundin e një karriere politike, por rrënimin e një sistemi të kalbur, ku korrupsioni dhe pandëshkueshmëria ishin bërë normë. Pas dekadash në majat e pushtetit, Meta, dikur President i Shqipërisë dhe një nga figurat më me ndikim në historinë moderne të vendit, tani përballet me realitetin e një përplasjeje të ashpër me drejtësinë.

Arrestimi i ish-kryetarit të Kuvendit, ish-presidentit, ish-kryeministrit  Ilir Meta , do të duhet  të ishte kursyer nga skenat e shëmtuara  dhe banditeske  të BKH-së dhe policisë,  për një ish-funksionar të lartë shteti.

Një politikan që ka përdorur çdo mundësi për të mbijetuar, Meta e shfrytëzoi skenën politike për të krijuar aleanca të dyshimta dhe për të ndërtuar një perandori të errët në hije. Arrestimi i tij për çështjen CEZ DIA, akuzat për pastrim parash dhe mosdeklarim pasurie janë vetëm maja e ajsbergut të një karriere të mbushur me dyshime për korrupsion. Urdhri i tre prokurorëve përfshirë dhe “Dumdumani” për arrestimin e tij, është një sinjal i qartë se koha  për të sfiduar drejtësinë mund të ketë mbaruar.

Por çfarë nënkupton ky arrestim për skenën politike shqiptare? A është kjo goditja e fundit për opozitën? A është një veprim mekanik i diktuar nga ‘presionet euroatlantike’, një përpjekje për të pastruar skenën para zgjedhjeve? A është kjo lëvizje strategjike e Ramës për të eliminuar kundërshtarët dhe për të mbetur i vetëm në zgjedhjet për mandatin e katërt? A mbijeton dot Rama pa Berishën dhe Metën?  Pyetjet janë të shumta, dhe përgjigjet priten të jenë po aq  të shumta.

Nëse arrestimi i Metës sinjalizon një pastrim të elitës së vjetër  politike, a duhet të presim që edhe figura të tjera të fuqishme që akuzohen se kanë abuzuar me qindramilionë euro  PPP, dhe inceneratorin e Tiranës, si kryebashkiaku  Veliaj të shkojë në qeli!

Gjithçka mbetet për t’u parë, por një gjë është e qartë: Shqipëria ndodhet në prag të një ndryshimi të madh, dhe vitet e ardhshme do të vendosin nëse ky është fundi i një epoke të ndotur nga korrupsioni, apo vetëm një akt tjetër në dramën e pafundme të politikës shqiptare duke sulltanizuar Ramën.

Ndërkohë që Meta mban prangat e drejtësisë, kambanat kanë nisur të bien për Edi Ramën.