Gara për kreun e PD, Salianji: Berisha humbi burrërinë

Ish-deputeti i Partisë Demokratike të Shqipërisë, Ervin Salianji, ka reaguar ashpër pas skualifikimit të kandidatëve të tjerë nga gara për drejtimin e partisë, duke lënë në garë vetëm kryetarin aktual, Sali Berisha.

Në një postim në rrjetet sociale, Salianji kritikon mënyrën se si po drejtohet PD, duke e cilësuar lidershipin aktual si të përqendruar te një individ dhe jo te anëtarësia. Ai paralajmëron se mungesa e garës së brendshme dhe drejtimi aktual po e çojnë partinë drejt dobësimit dhe humbjes së besimit publik. Sipas tij, Berisha është një lider i konsumuar dhe i paaftë për të bashkuar opozitën dhe për të sjellë ndryshim.

Zhvillimet vijnë pasi kandidatët e tjerë, Vladimir Mulaj dhe Mereme Sela, nuk u kualifikuan për në garë, pas verifikimeve nga KOKOE, duke e kthyer procesin në një votim pa rivalë.

Reagimi i plotë i Ervin Salianjit:

“Standardi mizerabël se si Berisha po trajton Partinë Demokratike shpreh mungesën e thellë të përgjegjësisë historike për sakrificat e demokratëve që prej 13 vitesh dergjen në opozitë.
Shpërfaqja e këtij shtetari deri në degradim total me ndasi, me idiotësi, me miq dhe armiq imagjinar… me rrena dhe gënjeshtra të poshtra që i kanë lënë demokratët 13 vite rrugëve, shprehin humbjen e “kështjellës” së fundit që ai kishte arritur të fshinte: burrërinë.
Ai dhe rrethi që i kacavirret abuzon me besnikërinë dhe vlerat e demokratëve, duke i vendosur përballë një presioni moral: të heshtin “për respekt të moshës”, të heshtin përballë “ndereve që i janë bërë”, të heshtin para shuarjes së PD për shkak të lidhjes me të.
Kush mban përgjegjësi për humbjen më të thellë që nga 1997, me 11 Maj 2025? Kush i bëri listat? Kush hartoi programin banal sikur të ishte viti 1995? Kush e drejtoi fushatën?
Dhe pyetja më e rëndësishme: si do të fitojë Partia Demokratike?
Edhe demokratët më të fandaksur e dinë që me Sali Berishën dhe këtë lidership, nuk do fitohet kurrë.
Çdo ditë që ai qëndron në krye të Partia Demokratike e Shqipërisë është një humbje për opozitën dhe për Shqipërinë.
Koha punon vetëm për ndryshimin. Sali Berisha nuk mund ta përfaqësojë kurrë atë.
Ai është i konsumuar, i izoluar, i hetuar, i paaftë për të bashkuar opozitën.
Nuk mund të flasim për ndryshim në Shqipëri, duke refuzuar ndryshimin në PD. Ne nuk mund të kërkojmë votën e shqiptarëve kështu.

Pse është e pamundur të sfidohet Sali Berisha, në PD?
Partia Demokratike nuk mund të jetë kurrë e fortë pa garë, pa përfaqësim, pa përgjegjësi.
Çdo përpjekje për t’i shmangur këto e dobëson Partinë Demokratike dhe e largon nga qytetarët.
Partia Demokratike nuk mund të jetë parti individi, nuk e meriton të jetë! Ajo duhet të rikthehet në një parti masash dhe pushteti. Ajo është pronë e demokratëve dhe shpresa e mijëra shqiptarëve që presin rotacionin prej vitesh!
PD nuk e meriton të shuhet për shkak të liderit të saj.
Llogaritë i kanë bërë gabim, veçanërisht me mua dhe shumicën e demokratëve.
Koha thërret demokratët të mos heshtin.”