Garë ‘e nxehtë’ në Policinë e Shtetit, mbyllet sot afati i aplikimeve

Sot mbyllet afati për dorëzimin e aplikimeve për garën për postin e Drejtorit të Përgjithshëm të Policisë së Shtetit, pas largimit të Ilir Prodës. Deri tani janë paraqitur katër kandidatë: Elidon Çela, drejtor i Policisë së Vlorës; Pëllumb Seferi, drejtori për Marrëdhëniet Ndërkombëtare në DPPSH; Skënder Hitaj, drejtor i Policisë së Fierit; dhe Idajet Faskaj.

Në garë pritet të paraqiten edhe punonjës të tjerë të policisë me gradat Drejtues, Drejtues i Parë dhe Drejtues i Lartë. Pas mbylljes së afatit, Ministria e Brendshme do të publikojë listën zyrtare të kandidatëve. Brenda dhjetë ditëve, një Komision i Posaçëm i përbërë nga tre anëtarë – një zëvendësministër i Brendshëm si kryetar, sekretari i përgjithshëm i ministrisë dhe kreu i Agjencisë së Mbikëqyrjes Policore – do të kryejë vlerësimin paraprak të aplikimeve për të verifikuar kushtet ligjore.

Pas kësaj, hartohet lista përfundimtare e kandidatëve që plotësojnë kriteret. Në fazën e intervistimit, secili kandidat prezanton platformën e tij për 20 minuta. Komisioni ka afat 48 orë pas intervistimit për të nxjerrë pikëzimin e kandidatëve.

Sipas ligjit, kandidati me pikët më të larta nuk emërohet automatikisht. Ministri i Brendshëm propozon për Këshillin e Ministrave kandidatin që konsiderohet më i përshtatshëm për postin e Drejtorit të Përgjithshëm të Policisë së Shtetit.