Gjanica ‘pushtohet’ nga mbetjet hidrokarbure dhe era e rëndë

Prej vitesh lumi Gjanica mbetet një nga shqetësimet më të mëdha mjedisore për qytetarët e Fierit, ndërsa ndotja që mbart rrezikon seriozisht shëndetin e komunitetit. Situata është përkeqësuar ndjeshëm ditët e fundit, ku era e rëndë dhe ngjyra e zezë e ujit janë përhapur në të gjithë zonën përreth.

Sipas banorëve, fenomeni intensifikohet veçanërisht gjatë ditëve me shi, kur dyshohet se kompani të hidrokarbureve shkarkojnë mbetje të pakontrolluara në shtratin e lumit. Pamjet e fundit të bëra publike tregojnë një ndotje të lartë, ujë tërësisht të errët dhe një mjedis të degraduar, duke shkatërruar faunën ujore dhe duke rritur rrezikun për banorët që e quajnë Gjanicën “mallkimin e qytetit”.

Situata pritet të rëndohet edhe më shumë gjatë stinës së reshjeve, sidomos kur shirat janë me intensitet të lartë, çka historikisht ka sjellë shkarkime më agresive të mbetjeve industriale.

Banorët e Fierit prej kohësh kërkojnë ndërhyrje urgjente dhe zgjidhje të qëndrueshme, ndërsa institucionet përgjegjëse janë vënë shpesh në qendër të kritikave për mungesë kontrolli dhe transparence mbi aktivitetin e kompanive që operojnë në zonë.