Ish-efektivi i RENEA-s Adrian Pikli dhe katër të pandehur të tjerë shpallen fajtorë për sigurim mjetesh për vrasje, trafik droge dhe armësh

Gjykata e Posaçme kundër Korrupsionit dhe Krimit të Organizuar (GJKKO) ka dhënë vendimin për pesë anëtarë të një grupi kriminal të hetuar në kuadër të dosjes së madhe të koduar “Revanshi”.

Procesi gjyqësor, i zhvilluar si një fraksion i kësaj dosjeje, përfundoi me shpalljen fajtorë të të pandehurve për një sërë veprash të rënda penale, përfshirë sigurimin e kushteve dhe mjeteve për vrasje, kultivimin dhe trafikimin e lëndëve narkotike, si dhe armëmbajtjen pa leje.

Të pestë të pandehurit përfituan nga gjykimi i shkurtuar, duke marrë një ulje të dënimit me një të tretën.

Dënimet për secilin prej të pandehurve

Sipas vendimit të GJKKO-së, ish-efektivi i forcave speciale RENEA, Adrian Pikli, dhe Devis Bajramaj u dënuan fillimisht me nga 10 vite burgim. Pas aplikimit të gjykimit të shkurtuar, dënimi për secilin u reduktua në 6 vite e 8 muaj burg.

Ndërkohë, Elvis Ndreca dhe Edison Muçeku u dënuan fillimisht me nga 8 vite burg, por përfundimisht do të vuajnë 5 vite e 4 muaj burg.

Dënimin më të lartë nga ky grup e mori Armando Ndreca, i cili nga 11 vite burgim u reduktua në 7 vite e 4 muaj burg pas përfitimit nga gjykimi i shkurtuar.

Veprat kriminale të zbuluara nga SPAK

Sipas hetimeve të Prokurorisë së Posaçme, aktiviteti kriminal i këtij grupi është shtrirë gjatë viteve 2020-2021 dhe përfshinte disa episode të rënda.

Atentati në Tapizë

Një nga episodet e hetuara lidhet me atentatin e 4 nëntorit 2020 në zonën e Urës së Tapizës, në Fushë-Krujë.

Sipas SPAK, Albert Zaja, në bashkëpunim me persona të tjerë, dyshohet se tentoi vrasjen me armë zjarri të shtetasve Durim Bami dhe Ervin Kodra.

Planet për eliminime fizike

Hetimet zbuluan gjithashtu sigurimin e mjeteve dhe kushteve për kryerjen e vrasjeve të planifikuara.

Gjatë periudhës maj-korrik 2020, sipas akuzës, Albert Zaja dhe Edison Muçeku siguruan mjetet e nevojshme për eliminimin e shtetasit Hamza Terziu.

Ndërsa gjatë muajve korrik-gusht 2020, Elvis Ndreca dyshohet se siguroi mjetet për vrasjen e shtetasit Durim Bami.

Trafiku i kanabisit në Lezhë

Një tjetër episod i rëndësishëm lidhet me trafikun e drogës.

Sipas SPAK, në tetor të vitit 2020, Armando Ndreca organizoi dhe financoi një grup kriminal që merrej me prodhimin dhe shitjen e kanabisit sativë.

Hetimet kanë dokumentuar prodhimin dhe shpërndarjen e një sasie prej 243 kilogramësh kanabis në zonën e Lezhës.

Tregtia e paligjshme e armëve

Në dosjen hetimore është përfshirë edhe aktiviteti i paligjshëm me armët.

Sipas akuzës, gjatë viteve 2020-2021, Devis Bajramaj dhe ish-efektivi i RENEA-s Adrian Pikli janë përfshirë në sigurimin dhe shitjen e armëve dhe municioneve luftarake, përfshirë persona me precedentë penalë.

Vendimi i GJKKO-së për këtë grup kriminal vjen si pjesë e hetimeve të zgjeruara të dosjes “Revanshi”, një nga procedimet më të rëndësishme të SPAK kundër grupeve kriminale.