GJKKO dënon me burg ish-oficerin e Antiterrorit, Igli Haxhiaj

Gjykata e Posaçme kundër Korrupsionit dhe Krimit të Organizuar ka shpallur fajtor ish-oficerin e Antiterrorit, Igli Haxhiaj, duke e dënuar me 4 vite burg për një sërë veprash penale të lidhura me detyrën. Për shkak të procedurës së gjykimit të shkurtuar, dënimi përfundimtar u ul në 2 vite e 8 muaj heqje lirie.

Përveç dënimit me burg, gjykata vendosi edhe ndalimin e ushtrimit të funksioneve publike për një periudhë prej 5 vitesh. Sipas vendimit, vuajtja e dënimit do të llogaritet nga data e ndalimit, 27 nëntor 2025, dhe do të kryhet në një institucion të sigurisë së zakonshme.

Ish-oficeri u gjet fajtor për shpërdorim detyre, zbulim të akteve dhe të dhënave sekrete, si dhe korrupsion pasiv në radhët e funksionarëve të drejtësisë. Gjykata urdhëroi gjithashtu që ai të përballojë edhe shpenzimet e hetimit dhe të procesit gjyqësor.

Sipas hetimeve, Igli Haxhiaj rezulton i përfshirë në aktivitete të trafikut ndërkombëtar të lëndëve narkotike, në bashkëpunim me grupin e Elvis Doçit, i njohur si “Visi i Pojës”. Provat kryesore përfshijnë komunikime të zbardhura nga platforma SkyECC, të cilat e implikojnë drejtpërdrejt në këto veprimtari, në kohën kur ai ushtronte detyrën si oficer në strukturat operacionale.

Haxhiaj u arrestua në nëntor të vitit 2025 në kuadër të një operacioni të SPAK, ndërsa hetimet ndaj tij u mbyllën në muajin maj të këtij viti. Sipas organit të akuzës, veprat penale janë kryer në funksion të detyrës, duke cenuar rëndë besimin ndaj institucioneve të sigurisë dhe drejtësisë.

Vendimi i GJKKO nuk është përfundimtar dhe mund të ankimohet në Gjykatën e Posaçme të Apelit brenda 15 ditëve nga momenti i shpalljes së tij.