GJKKO heq sekuestron e pasurive të ish-gjyqtarit Shkëlzen Selimi

Vendimi vjen pas shpalljes së pafajësisë së ish-gjyqtarit në të dyja shkallët e gjykimit. Në listë janë dy pika karburanti dhe një truall në Vlorë.

Gjykata e Posaçme ka vendosur heqjen e masës së sekuestros mbi disa prej pasurive që ishin bllokuar gjatë hetimit ndaj ish-gjyqtarit të Gjykatës së Lartë, Shkëlzen Selimi.

Vendimi i GJKKO-së mbështetet në argumentin se nuk ekzistojnë më kushtet ligjore për vijimin e masës së sekuestros mbi pasuritë që kanë qenë objekt i procedimit.

Mes pasurive që nuk do të qëndrojnë më nën sekuestro është gjysma e një pike karburanti në Lungomaren e Vlorës, si dhe një truall me sipërfaqe rreth 2,400 metra katrorë në Jonufër.

Në vendim përfshihet gjithashtu një tjetër pikë karburanti në zonën e Transballkanikes në Vlorë.

Dy pasuritë e fundit figurojnë të regjistruara në emër të Kujtim Selimit.

Vendimi pas përfundimit të procesit penal

Heqja e sekuestros vjen pas përfundimit të procesit gjyqësor ndaj Shkëlzen Selimit, i cili ishte përballur me akuzën e deklarimit të rremë të pasurisë.

Pasuritë e ish-gjyqtarit ishin sekuestruar fillimisht në vitin 2021, në kuadër të një hetimi të SPAK që përfshiu edhe ish-gjyqtarë të tjerë të Gjykatës Kushtetuese dhe Gjykatës së Lartë.

Në atë periudhë, hetuesit dyshuan se disa prej pasurive të ish-magjistratëve nuk justifikoheshin përmes burimeve të ligjshme të deklaruara.

Pas përfundimit të hetimeve, në tetor 2022, SPAK e dërgoi për gjykim çështjen ndaj Shkëlzen Selimit, duke e akuzuar për deklarim të rremë të pasurisë.

Procesi gjyqësor përfundoi me pafajësinë e ish-gjyqtarit në vitin 2025. Vendimi u kundërshtua nga SPAK dhe çështja kaloi në Apelin e GJKKO-së, i cili la në fuqi vendimin e shkallës së parë.

Në këto kushte, Gjykata e Posaçme ka vendosur tashmë edhe për fatin e disa prej pasurive që kishin mbetur nën masën e sekuestros gjatë procesit.

Vendimi do t’u komunikohet palëve nga Agjencia e Administrimit të Pasurive të Sekuestruara dhe të Konfiskuara, ndërsa ekzekutimi i tij do të kryhet pas përfundimit të afatit 15-ditor.

Shkëlzen Selimi u shkarkua nga vettingu në vitin 2018

Shkëlzen Selimi ka ushtruar funksione në sistemin e drejtësisë për rreth dy dekada, përpara se të shkarkohej nga detyra në vitin 2018, në kuadër të procesit të rivlerësimit kalimtar.

Vendimi i shkarkimit lidhej me konstatime për kontakte të papërshtatshme me persona të përfshirë në krimin e organizuar.

Në procesin e vettingut u përfshi edhe bashkëshortja e tij, Rilinda Selimi, ish-gjyqtare e Gjykatës Administrative të Apelit. Ajo gjithashtu u shkarkua nga Kolegji i Posaçëm i Apelimit për shkak të kontakteve të konsideruara të papërshtatshme.

Në rastin e Rilinda Selimit, shumica e trupit gjykues nuk konstatoi probleme lidhur me pasurinë e saj.

Me vendimin e fundit të GJKKO-së, disa prej pasurive të përfshira në hetimin e nisur vite më parë nuk do të qëndrojnë më nën masën e sekuestros, pas përfundimit të procesit penal ndaj ish-gjyqtarit Shkëlzen Selimi.