Apeli e shpall të pavlefshëm vendimin e Prokurorisë

Gjykata e Posaçme e Apelit kundër Korrupsionit dhe Krimit të Organizuar (GJKKO) ka vendosur këtë të mërkurë, më 11 shkurt 2026, heqjen e masës së sekuestros mbi llogaritë bankare të Olsi Ibros.

Vendimi është dhënë nga gjyqtari Florian Kalaja, pas ankimimit të paraqitur nga familjarët e Ibros. Sipas arsyetimit të gjykatës, vendimi i mëparshëm i Prokurorisë për sekuestrimin e llogarive është konsideruar “absolutisht i pavlefshëm”, çka ka çuar në shfuqizimin e masës së bllokimit.

Për rrjedhojë, Apeli ka urdhëruar heqjen e sekuestros mbi llogaritë bankare në bankat e nivelit të dytë në emër të Olsi Ibros, duke ngarkuar SPAK-un me zbatimin e vendimit.

Dosja e mikrokredive

Olsi Ibro konsiderohej nga prokuroria si një nga figurat kyçe në skemën e mikrokredive, përmes së cilës, sipas hetimeve, mijëra qytetarë u përballën me procedura përmbarimore dhe detyrime të rënda financiare.

Në këtë çështje janë përmendur edhe emrat e Elda Ibros dhe Arben Meskutit, ndërsa hetimet kanë fokusuar aktivitetin e shoqërive MCA dhe Final, të cilat dyshohet se kanë grumbulluar të ardhura të konsiderueshme përmes praktikave që aktualisht janë nën hetim.

Pas shpërthimit të skandalit publik në vitin 2024, u njoftua zyrtarisht se Olsi Ibro i kishte dhënë fund jetës në korrik të atij viti. Megjithatë, çështja mbetet e ndjeshme dhe me shumë pikëpyetje për opinionin publik.

Një dosje me pasoja sociale

Skema e mikrokredive konsiderohet një nga rastet me impakt të lartë social në vitet e fundit, pasi preku mijëra familje shqiptare. Shumë prej tyre vijojnë të presin një zgjidhje përfundimtare ligjore dhe rikuperim të dëmeve të pretenduara.

Vendimi i Apelit për heqjen e sekuestros pritet të sjellë reagime, ndërsa mbetet për t’u parë se si do të vijojë procedimi penal dhe çfarë efekti do të ketë kjo lëvizje në hetimin e mëtejshëm të dosjes.