GJKKO kthen në SPAK dosjen ndaj Jonaid Myzyrit

Gjykata e Posaçme kundër Korrupsionit dhe Krimit të Organizuar ka vendosur të rikthejë për plotësim hetimesh çështjen ndaj ish-kreut të Komisionit të Prokurimit Publik, Jonaid Myzyri, duke mos pranuar kërkesën e SPAK për pushimin e saj.

Sipas vendimit, Prokuroria e Posaçme ka një afat prej 45 ditësh për të kryer veprime shtesë hetimore, mes të cilave edhe realizimin e një akt-ekspertimi të detajuar mbi procedurën e ndjekur.

Myzyri u vu nën akuzë për shkelje të barazisë në tendera, por pas rreth një viti hetimesh, prokurori i çështjes argumentoi se nuk ishin gjetur prova të mjaftueshme që të vërtetonin konsumimin e veprës penale, duke kërkuar pushimin e dosjes.

Në të njëjtën kërkesë, SPAK përfshiu edhe anëtarët e tjerë të Komisionit të Prokurimit Publik: Vilma Zhupaj, Lindita Skeja, Merita Zeqaj dhe Enkeleda Bega, për të cilët gjithashtu u kërkua mbyllja e hetimeve.

Hetimi lidhet me një procedurë tenderimi të zhvilluar në vitin 2020 nga Autoriteti Rrugor Shqiptar, me vlerë rreth 2.2 milionë euro, për mirëmbajtjen e disa segmenteve rrugore në zonën Rrëshen–Shpal–Qafë Bene–Hadroj dhe Shpal–Ura e Repsit, me një gjatësi totale prej 59 kilometrash.

Sipas akuzës, gjatë këtij procesi janë konstatuar shkelje të ligjit, të cilat dyshohet se janë shpërfillur nga Komisioni i Prokurimit Publik. Hetimet pretendojnë se është favorizuar bashkimi i operatorëve ekonomikë “AEK Munella” dhe “Drini-1”, të cilët kanë fituar tenderin përmes dokumentacionit të parregullt.

Vendimi i Gjykatës për rikthimin e dosjes për hetime shtesë pritet të ndikojë në zbardhjen e plotë të rrethanave dhe në përcaktimin e përgjegjësive ligjore për këtë procedurë.