Gjykata e Posaçme kundër Korrupsionit dhe Krimit të Organizuar ka vendosur të mos pranojë kërkesën e Ajola Xoxës për ndërprerjen e procesit gjyqësor ndaj saj.

Xoxa, e cila është bashkëshortja e kryebashkiakut të Tiranës, Erion Veliaj, kishte paraqitur kërkesë për shtyrjen e seancës dhe pezullimin e gjykimit, duke argumentuar se ndodhet në periudhë rikuperimi pas lindjes me operacion cezarian dhe se kjo situatë e pengon të ushtrojë në mënyrë të plotë të drejtën e saj për mbrojtje.

Megjithatë, trupi gjykues vlerësoi se dokumentacioni i paraqitur nuk përbën një gjendje paaftësie për punë, duke theksuar se raporti i lindjes nuk justifikon pezullimin e procedurave gjyqësore.

Seanca e ardhshme është caktuar të mbahet më 21 korrik, në orën 10:00.

Nga ana tjetër, mbrojtja kishte kërkuar që procesi të ndërpritej deri në përfundim të plotë të lejes pas lindjes. Ndërkohë, Prokuroria e Posaçme kundër Korrupsionit dhe Krimit të Organizuar (SPAK) ia kishte lënë në vlerësim gjykatës mundësinë për ndarjen e çështjes së Xoxës nga ajo e të pandehurve të tjerë.

Në lidhje me kryebashkiakun e Tiranës, Erion Veliaj, gjykata ka vendosur pezullimin e afateve të paraburgimit.