Goditen 3 “Exchange” të palicencuar për këmbim valutor në Tiranë

Policia kanë ndërmarrë një aksion të koordinuar në Tiranë, duke evidentuar dhe goditur tre subjekte që ushtronin aktivitet të paligjshëm në fushën e këmbimit valutor. Si rezultat i kontrolleve, janë sekuestruar shuma të konsiderueshme parash në valuta të ndryshme, ndërsa pronarët e këtyre subjekteve janë vënë nën hetim.

Operacioni është zhvilluar nga strukturat e specializuara kundër pastrimit të parave dhe aseteve kriminale, në kuadër të një plani të posaçëm masash për parandalimin dhe goditjen e aktiviteteve të paligjshme. Gjatë verifikimeve në terren, u konstatuan tre raste të ushtrimit të këmbimit valutor pa licencën përkatëse.

Në vijim të veprimeve procedurale, materialet janë referuar në Prokurorinë e Tiranës, e cila ka nisur hetimet ndaj tre shtetasve, përkatësisht një 31-vjeçar, një 35-vjeçare dhe një 40-vjeçar. Këta persona administronin subjekte të vendosura në zona të ndryshme të kryeqytetit, ku dyshohet se kryenin aktivitet financiar jashtë kuadrit ligjor.

Gjatë kontrolleve, autoritetet sekuestruan 45 mijë euro, 7 mijë dollarë amerikanë, 3 mijë paund britanikë dhe 1.5 milionë lekë, të cilat dyshohet se janë përfituar nga kjo veprimtari e paligjshme.

Policia ka bërë të ditur se kontrollet dhe hetimet do të vijojnë, me synim identifikimin e rasteve të tjera të ngjashme dhe vendosjen përpara përgjegjësisë ligjore të çdo subjekti që operon në kundërshtim me ligjin.