Ngrihen pikëpyetje për vizitën

A lidhet me Ramën dhe projektin e Jared Kushner në Zvërnec?

Prania e Richard Grenell në Vlorë ka nxitur spekulime në rrjetet sociale mbi arsyet e vizitës së tij në Shqipëri, veçanërisht për shkak të afërsisë së tij politike me Presidentin amerikan Donald Trump dhe angazhimeve të mëparshme diplomatike në Ballkan.

Në një postim të publikuar nga faqja “antidroga07” pretendohet se vizita e Grenell merr një rëndësi të veçantë për shkak se përkon me qëndrimin e kryeministrit Edi Rama në të njëjtën zonë.

Në qendër të aludimeve vendoset projekti turistik në zonën Vjosë-Nartë-Zvërnec, i lidhur publikisht me Jared Kushner, dhëndrin e Presidentit Trump. Projekti dhe investimet e Kushner në Shqipëri kanë marrë vëmendje të gjerë ndërkombëtare, ndërsa në raportimet mediatike janë ngritur çështje që lidhen me pronësinë e tokave, ndikimin mjedisor dhe kundërshtimet ndaj zhvillimeve të planifikuara.

Postimi shkon më tej, duke e lidhur vizitën e Grenell me debatet dhe akuzat e pakonfirmuara që kanë përfshirë emrat e Jared Kushner dhe Ivanka Trump. Vetë autori i postimit thekson se nuk ka prova që Kushner apo Ivanka Trump të kenë bashkëpunuar me persona të përfshirë në trafik apo krim të organizuar.

Megjithatë, mbi këtë bazë ngrihet një seri pyetjesh politike: A ka pasur Grenell një takim me Edi Ramën? A lidhet vizita e tij me investimet e Jared Kushner në Shqipëri? Apo Grenell mund të ketë përcjellë ndonjë mesazh të administratës Trump lidhur me zhvillimet e fundit?

Deri në këtë moment, në materialin e publikuar nuk paraqitet asnjë provë që Grenell të jetë dërguar nga Donald Trump për t’i përcjellë një “ultimatum” Edi Ramës dhe as ndonjë konfirmim zyrtar për një takim mes tyre. Për këtë arsye, pretendimi mbetet në nivelin e aludimit dhe jo të një fakti të konfirmuar.