Greqia ndalon rrjetet sociale për fëmijët nën 15 vjeç

Qeveria greke është duke përgatitur një plan ambicioz për të kufizuar aksesin e të miturve në rrjetet sociale dhe platformat online, me qëllim mbrojtjen e tyre nga rreziqet që vijnë nga bota dixhitale.

Sipas burimeve të “Protothema”, ky plan parashikon ndalimin e plotë të përdorimit të rrjeteve sociale nga fëmijët nën moshën 15 vjeç. Po ashtu, parashikohet bllokimi i aksesit për të miturit nën 18 vjeç në platformat e basteve online dhe në blerjen e produkteve të duhanit.

Synimi i qeverisë është që deri në fund të tetorit Greqia të bëhet vendi i parë në Evropë që vendos masa të tilla të drejtpërdrejta për të mbrojtur fëmijët në mjedisin virtual.

Një hap i ngjashëm është ndërmarrë edhe nga Australia, e cila prej 10 tetorit ka vendosur kufizime të forta për fëmijët nën 16 vjeç në rrjetet sociale dhe platformat e takimeve online, për t’i mbrojtur nga ngacmimet, manipulimet algoritmike dhe ekspozimi ndaj përmbajtjeve të papërshtatshme.

Ndërkohë, edhe Bashkimi Evropian po avancon me përgatitjet për masa të ngjashme. Presidentja e Komisionit Evropian, Ursula von der Leyen, ka deklaruar se disa shtete — përfshirë Francën, Spanjën, Greqinë, Danimarkën dhe Italinë — janë tashmë në fazën e testimit të një plani për verifikimin e moshës në aplikacionet e tyre kombëtare.

Në këtë kuadër, edhe kryeministri grek Kyriakos Mitsotakis ka konfirmuar angazhimin e Greqisë në këtë iniciativë. “Po shqyrtojmë seriozisht ndalimin e përdorimit të mediave sociale për fëmijët nën 16 vjeç, ashtu siç po bën Australia,” u shpreh ai.