I riu me aftësi të kufizuara: Më arrestoni, vetëm të bëhet ky vend

Një person me aftësi të kufizuara në Korçë ka dalë në protestë në mbështetje të studentëve, duke përcjellë një mesazh të fortë për gjendjen ekonomike dhe vështirësitë me të cilat përballet çdo ditë. Ai i është drejtuar me një apel Policisë, ndërsa ka ngritur shqetësimin për mungesën e shërbimeve të nevojshme dhe kostot e larta të trajtimit shëndetësor.

Në një deklaratë për mediat, qytetari tha se nuk arrin të marrë shërbimet që i nevojiten dhe se një seancë fizioterapie në një klinikë private kushton 30 mijë lekë, një shpenzim i rëndë për të ardhurat që disponon.

Pjesëmarrjen në protestë ai e shoqëroi me një mesazh që pasqyron ndjenjën e izolimit dhe pamundësisë për të përballuar jetën e përditshme. Duke iu drejtuar Policisë, ai u shpreh se është gati të përballet edhe me arrestimin, nëse kjo do të thotë të qëndrojë për një kauzë që e konsideron të drejtë.

“Unë në shtëpi, në burg jam. Le të më arrestojnë. Më mirë të rri në burg për një kauzë të vërtetë, sesa në shtëpi në burg pa bërë faj. Vetëm të bëhet ky vend. Me këto pasuri që kemi ne të jetojmë me 300 mijë lekë kemp është turp”, deklaroi ai.

Apeli i tij e zhvendos vëmendjen te vështirësitë me të cilat përballen personat me aftësi të kufizuara, të cilët, përveç sfidave të përditshme, duhet të përballojnë edhe koston e shërbimeve që u nevojiten.

Pjesëmarrja e tij në protestën e studentëve në Korçë vjen në një moment kur të rinjtë po kërkojnë ndryshime dhe po ngrenë zërin për problematikat që prekin shoqërinë. Mesazhi i qytetarit sjell në vëmendje edhe një tjetër shqetësim: vështirësinë për të siguruar trajtim dhe kushte dinjitoze jetese me të ardhura të kufizuara.