IKM nuk e pa në 6 vite zaptimin e trotuarit nga Ram Geci

Prej 6 vitesh, një pjesë e trotuarit publik në një nga zonat më të populluara të Tiranës është zaptuar pa u trazuar nga autoritetet. Në zemër të kryeqytetit, përballë syve të qytetarëve dhe institucioneve shtetërore, kulla luksoze e oligarkut Ram Geci ka bllokuar qasjen publike duke detyruar qytetarët përfshirë nënat me fëmijë në karroca  të ecin mes rrugës, në përballje të përditshme me trafikun.

6 vite pa trotuar, 6 vite në rrezik…

Edhe pse ndërtesa është përfunduar që prej 2 vitesh, hapësira publike vijon të jetë e rrethuar me barriera metalike, ndërsa IMT-ja dhe bashkia heshtin. Nuk ka asnjë aksion për lirimin e trotuarit, nuk ka asnjë reagim për kthimin e hapësirës publike qytetarëve.

Ironikisht, IMT-ja mobilizohet për të hequr karriget e kafeneve, ndërsa për kullat e oligarkëve si kjo e Ram Gecit, bën “sikur s’ka sy”.

Ky është një tjetër simbol i kapjes së shtetit nga oligarkët, ku pushteti vendor dhe institucionet shtetërore zbatojnë ligjin me dy standarde, duke goditur të vegjlit dhe duke mbrojtur të mëdhenjtë.