Inxhinieri humb jetën gjatë inspektimit të punimeve në Peqin

Një aksident tragjik në fshatin Paulesh të Peqinit, i ka marrë jetën e inxhinierit Guri Dashi, me origjinë nga Rrajca e Librazhdit. Ai ka punuar prej vitesh në disa prej kompanive më të mëdha të ndërtimit në vend dhe ishte i njohur si profesionist i përkushtuar dhe familjar shembullor.

Vdekja e tij ka shkaktuar dhimbje të thellë për familjen, miqtë dhe kolegët, ndërsa më së shumti vuajnë fëmijët e tij të mitur.

Grupi hetimor ka shkuar menjëherë në vendngjarje për të sqaruar rrethanat e aksidentit. Sipas Policisë, specialistët për Hetimin e Krimeve në Komisariatin e Policisë Peqin kanë arrestuar Enver Hoxhën, 64 vjeç, drejtues teknik në kantierin ku ndodhi ngjarja. Ai dyshohet për veprën penale “Shkelja e rregullave të mbrojtjes në punë”, pasi mosrespektimi i protokolleve të sigurisë ka çuar në pasojën fatale.

Hetimet janë ende në zhvillim për të përcaktuar plotësisht shkaqet e tragjedisë.

Njoftimi i policisë:

Specialistët për Hetimin e Krimeve të Komisariatit të Policisë Peqin arrestuan në flagrancë shtetasin E. H., 64 vjeç, me detyrë drejtues teknik, për veprën penale “Shkelja e rregullave të mbrojtjes në punë”, pasi pasditen e djeshme, gjatë punës në kantierin e ndërtimit, në fshatin Paulesh, ka rënë nga lartësia dhe për pasojë ka humbur jetën inxhinieri, shtetasi G. D., 42 vjeç.