Izraeli ka nisur një ofensivë të re tokësore në veri dhe jug të Gazës, pas një vale të fuqishme bombardimesh ajrore gjatë natës që kanë lënë mbi 100 persona të vdekur, sipas autoriteteve shëndetësore në territorin palestinez. Sulmet kanë çuar edhe në mbylljen e spitalit të fundit funksional në veri të Gazës, në Beit Lahiya.
Ofensiva e re ushtarake, e quajtur “Qerret e Gedeonit”, është shoqëruar me përpjekje diplomatike për arritjen e një armëpushimi, ndërsa negociatat pa kushte midis Hamasit dhe Izraelit kanë rifilluar në Doha, Katar.
Izraeli ka shprehur gatishmëri për të përfunduar luftën vetëm nëse Hamasi dorëzohet, gjë që konsiderohet e pamundur nga shumë analistë. Nga ana tjetër, një zyrtar i lartë i Hamasit ka deklaruar se grupi është gati të lirojë 7 deri në 9 pengje izraelite në këmbim të një armëpushimi 60-ditor dhe lirimit të 300 të burgosurve palestinezë.
Ofensiva izraelite po vjen me një kosto të lartë për civilët. Më shumë se 300 persona janë vrarë dhe mbi 1000 janë plagosur që nga e enjtja, sipas Ministrisë palestineze të Shëndetësisë. Familje të tëra janë shuar në gjumë, përfshirë një foshnje, dy motrat e tij të vogla dhe prindërit në kampin e zhvendosurve në Al-Mawasi.
Sistemi shëndetësor i Gazës është në prag të kolapsit. Spitali indonezian në Beit Lahiya, i vetmi funksional në veri, është goditur rëndë dhe ndodhet jashtë funksionit. Drejtori i spitalit, Dr. Marwan Al-Sultan, tha se shpërthimet shkëputën respiratorët që mbanin pacientët gjallë dhe spitali është “plotësisht i rrethuar”.
Spitali Al-Awda gjithashtu është dëmtuar rëndë, duke mbetur pa oksigjen, energji elektrike dhe ujë. Të gjitha spitalet publike në veri të Gazës janë gjithashtu jashtë funksionit, sipas Ministrisë së Shëndetësisë.
OKB paralajmëron se më shumë se 2.1 milionë njerëz (e gjithë popullsia e Gazës), rrezikojnë urinë për shkak të bllokadës dhe zhvendosjeve masive që kanë zgjatur për më shumë se 19 muaj.
Komisioneri i OKB-së për të drejtat e njeriut, Volker Turk, e ka krahasuar ofensivën e re me “spastrim etnik”, duke thënë se sulmet dhe mohimi i ndihmave humanitare tregojnë një përpjekje për ndryshim të përhershëm demografik në Gaza, në shkelje të ligjit ndërkombëtar.
Numri i viktimave që nga 7 tetori 2023 ka shkuar në mbi 53,000, shumica gra dhe fëmijë, sipas Ministrisë palestineze të Shëndetësisë.
