Ju sakatoj po më dolët kundër!

Ndër informacionet e pakta që dalin nga Koreja e Veriut, është edhe një ngjarje që tregohet si një shaka që portretizon regjimin.

Kim Jong Un shkon në një universitet për bashkëbisedim dhe, pasi flet për dy orë mbi sukseset e udhëheqjes së tij, kërkon pyetje nga studentët. Pas disa pyetjeve servile vjen një e papritur. Një student e pyet pse dyqanet janë bosh, pse vitrinat mbushen me produkte plastike dhe pse vendi është më i varfër se Koreja e Jugut. Diktatori qeshi, u kollit dhe kërkoi pesë minuta pushim.

Pas pushimit kërkoi pyetje të tjera. Studenti i radhës e pyeti: pse dyqanet janë bosh, pse vitrinat mbushen me produkte plastike, pse vendi është më i varfër se Koreja e Jugut dhe, e fundit, ku përfundoi studenti që pyeti para tij.

Edi Rama sot u soll njësoj si Kim Jong Un me gazetaren Ambrozia Meta dhe më pas me gazetarin Isa Myzyraj, i cili tentoi të ngrihej në këmbë pasi u përjashtua përjetë kolegia e tij. Të tjerët reaguan sipas interesave të pronarëve të shpallur investitorë strategjikë.

Përveç Niko Peleshit, që ka mbajtur shënime, Edi Rama u tregoi të gjithëve se çfarë do të thotë kërcënimi: “ju sakatoj po më dolët kundër.”