Dikur ishte tmerr të kandidonte një aktor humori,sot u bë fakt!

Publik.al | 8 Tetor 2025

Duket se mes humoristëve të estradës shqiptare ka plasur “lufta e brendshme” për fronin e opozitës në Tiranë. Pas vendimit të ish-kryeministrit Sali Berisha për të kandiduar aktorin Florjan Binaj përballë ministrës Ogerta Manastirliu, kolegu i tij i skenës, Julian Deda, ka shpërthyer në një reagim ironik dhe plot thumbime ndaj Partisë Demokratike.

“Thyerje tabush në PD, e cila ka vendosur të mbështesë një aktor humori në garën për bashkinë e Tiranës,” shkruan Deda, duke kujtuar me sarkazëm se në vitin 2023 ai vetë ishte refuzuar nga strukturat e PD-së me justifikimin se “nuk do shkojmë në bashki për gallatë”.

Sipas Dedës, kjo tregon një ndryshim të madh të mentalitetit në opozitë:

“Sot po bëhet fakt diçka që para dy vitesh ishte e tmerrshme të ndodhte. Progres i madh, komplimente PD-së.”

Në fund të reagimit, Deda hedh një tjetër kunjë ndaj drejtuesve demokratë, duke shtuar se shpreson që mbështetja ndaj Binajt të mos jetë e rreme, por reale, që “të mos përfundojë e djegur edhe një figurë tjetër e mirë, si shumë të tjera më parë”.

Reagimi i Dedës ka ndezur debat në rrjetet sociale, ku një pjesë e ndjekësve e lexojnë si kritikë të hapur ndaj hipokrizisë politike brenda opozitës, ndërsa të tjerë e shohin si garë për protagonizëm midis dy figurave të njohura të humorit shqiptar.