Kaos dhe trafik, kthimi i emigrantëve ‘paralizon’ Elbasanin

Trafiku në Unazën e Elbasanit është shndërruar në një makth të vërtetë çdo fundjavë, por situata bëhet edhe më e rënduar në prag të festave të fundvitit, kur emigrantët kthehen masivisht në vendlindje dhe fluksi i mjeteve rritet ndjeshëm.

Mungesa e infrastrukturës rrugore të përshtatshme për të përballuar këtë ngarkesë, veçanërisht mungesa e ByPass-it në rastin e Elbasanit, si dhe mungesa e rrugëve dytësore që do të shërbenin për lidhjen e fshatrave përreth, e bën lëvizjen gjithnjë e më problematike dhe qytetin të paralizuar për orë të tëra.

Në unazën jugore të Elbasanit përqendrohet një fluks i madh mjetesh: automjetet e dhjetëra fshatrave përreth, mjetet që kanë drejtim Cërrikun dhe Gramshin, si dhe i gjithë trafiku që përshkon aksin nacional Elbasan–Qafë Thanë. Kjo nyje rrugore mbart një peshë të jashtëzakonshme qarkullimi, pa pasur kapacitetin e nevojshëm për ta përballuar.

Vetëm aksi Elbasan–Qafë Thanë përllogaritet të përshkohet nga mbi 15 mijë mjete në ditë, pasi është një rrugë strategjike që lidh juglindjen e vendit me kryeqytetin, portin e Durrësit, si dhe pikat doganore të Qafë Thanës dhe Kapshticës. Kjo e bën Unazën e Elbasanit një nga pikat më problematike të trafikut, sidomos në periudhat festive.