Kërkohej në Gjermani, sekuestrohen pasuritë e shqiptarit dhe babait të tij

Prokuroria në Tiranë ka vendosur sekuestrimin e disa pasurive që dyshohet se lidhen me aktivitet kriminal të shtetasit Shkëlzen Kastrati, i shpallur në kërkim ndërkombëtar për trafik droge në Gjermani që nga viti 2022.

Sipas njoftimit të Prokuroria pranë Gjykatës së Shkallës së Parë të Juridiksionit të Përgjithshëm Tiranë, në kuadër të një hetimi pasuror janë sekuestruar edhe pasuri të babait të tij, pasi dyshohet se nuk justifikohen me të ardhura të ligjshme.

Hetimet janë kryer në bashkëpunim me Drejtoria e Policisë Tiranë, konkretisht me Seksionin e Krimit Ekonomik. Nga analiza financiare e kryer mbi procedimin pasuror të regjistruar në shkurt 2026, rezulton se personi nën hetim dhe familjarët e tij nuk kanë pasur mundësi financiare për të siguruar pasuritë e regjistruara në emër të tyre.

Sipas prokurorisë, dyshohet se këto pasuri janë krijuar si rezultat i përfshirjes së shtetasit në aktivitet kriminal të lidhur me prodhimin dhe trafikimin e narkotikëve në Gjermani. Për këtë arsye, gjykata ka vendosur masë sekuestrimi mbi disa prona në Durrës dhe Tiranë.

Mes pasurive të sekuestruara përfshihen:

• Një njësi me sipërfaqe 191 m² në zonën kadastrale të Plazhit në Durrës, e regjistruar në emër të babait të tij.

• Dy apartamente të tipit 1+1, secili me sipërfaqe totale 65.13 m², të ndodhura në të njëjtin kompleks banimi.

• Një garazh me numër 28 në të njëjtën godinë.

• Një apartament në rrugën “Don Bosko” në Tiranë, me sipërfaqe ndërtimi rreth 104.8 m² dhe ambiente të përbashkëta.

Autoritetet theksojnë se sekuestrimi është vendosur pasi dyshohet se këto prona janë përfituar nga aktivitet kriminal dhe nuk justifikohen me burime të ligjshme financiare. Hetimet për çështjen vijojnë.

Njoftimi i plotë:

Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm, Tiranë, u sekuestruan pasuritë e shtetasit Sh.K., i shpallur në kërkim ndërkombëtar për veprën penale ‘Trafikim të narkotikëve’ në Gjermani nga viti 2022 dhe babait të tij, I.K., pasi nuk justifikohen nga të ardhura apo fitimeve nga veprimtari të ligjshme.

Nga hetimet në bashkëpunim me Seksionin e Krimit Eekonomik, në Drejtorinë e Policisë Tiranë, mbi procedimin pasuror nr.01, regjistruar më 18.02.2026 dhe pas një analize të specializuar financiare, rezultoi se ky shtetas dhe personi i lidhur me të nuk kanë mundësi financiare për të siguruar pasuritë e regjistruara.

Në këto rrethana, Prokuroria pranë Gjykatës së Shkallës së Parë të Juridiksionit të Përgjithshëm Tiranë, vlerësoi se duhet që të procedohet me vendosjen e masave kufizuese ndaj pasurive të paluajtshme që kanë rezultuar deri në këtë moment të hetimit, pasi dyshohet se janë fituar si rezultat i përfshirjes së shtetasit Sh.K. në aktivitetin e prodhim dhe shitje narkotikësh. Prokuroria kërkoi dhe gjykata vendosi sekuestrimin e pasurive të Sh.K. dhe personit të lidhur me të, babait të tij, I.K., si më poshtë:

1- Pasuria e paluajtshme njësia nr.16, në Zonën Kadastrale 8518, Plazh Durrës, me sipërfaqe 191.00 metra katrorë, e përfituar nga shtetasi I.K;

2 – Pasuria e përfituar me kontratën për kalim të drejtash datë 31.08.2017, me perfitues shtetasin Sh.K.;

a). apartament nr.36, tipi 1+1, sipërfaqe neto 56.69 m², me sipërfaqe të përbashkët 8.44 m², dhe sipërfaqe totale 65.13 m² seksioni nr.3, kati i tretë banimi, (i katërt mbi tokë) i përbërë nga një dhomë e një kuzhinë dhe ambjente të tjera përdorimi të përbashkët;

b) Pasuria apartamenti nr.39, tipi 1+1, sipërfaqe neto 56.69 m² me sipërfaqe të përbashkët 8.44 m², dhe sipërfaqe totale 65.13 m² seksioni nr.3, kati i katërt banimi, (i pesti mbi tokë) i përbërë nga një dhomë e një kuzhinë dhe ambjente të tjera përdorimi të përbashkët;

c) Pasuria garazh me nr.28; si dhe

3- Pasuria e përfituar nga shtetasi Sh.K, me anë të kontratës së porosisë me nr.1265, apartament me sipërfaqe ndërtimi në total 104.8m², ambiente të përbashkëta 10.5m², në rrugën “Don Bosko” Tiranë.