Klodian Allajbeu i “Spitalit Amerikan” përfundon në SPAK

Drejtuesi ekzekutiv i Spitali Amerikan, Klodian Allajbeu, është paraqitur mesditën e kësaj të marte në ambientet e SPAK.

Deri më tani nuk ka një njoftim zyrtar mbi arsyen e thirrjes së tij nga Prokuroria e Posaçme. Megjithatë, burime jozyrtare bëjnë me dije se paraqitja e Allajbeut mund të lidhet me hetimet që po zhvillohen për koncesionet në sektorin e shëndetësisë.

Pak javë më parë, hetues të Byroja Kombëtare e Hetimit dhe të SPAK kanë ushtruar kontrolle dhe kanë kryer sekuestrime në zyrat e kompanisë “Evita” sh.p.k., e cila rezulton në pronësi të Klodian Allajbeut, si edhe në ambientet e Spitalit Amerikan.

Gjatë kontrolleve janë marrë disa pajisje elektronike, ndërsa në cilësinë e provës materiale është sekuestruar edhe telefoni personal i drejtuesit të Spitalit Amerikan.