KM ka në fyt thikën që kishte dëshmitarja e Belës

Çekuilibri i kryeministrit në konferencë për median është gjithnjë e më i thelluar, në adresë të shkarjeve kanosëse dhe ligjshkelëse, duke shënuar alarmin e dosjeve që kanë mbërritur në zyrën dhe banesën e tij. Duke qenë gjithëkontrollues i shtypit në masën dërrmuese, me përjashtime të pakta, Rama ndjen se ka ende vatra të medias që sjellin transparencë për korrupsionin dhe krimin e organizuar, me të cilin është lidhur ky kabinet ekzekutiv i drejtuar prej tij. Hallin e sotëm e përmendi disa herë, duke përmendur televizionet Syri TV dhe News24.

Madje kryeprokuroi-gjyqtar-kokë-ministri kishte dijeni se po hetohet atje, në prokurori. Tek ata “të paaftët”, sipas tij, të cilët nuk kishin haber se sa e ndershme ishte Balluku. Ata prokurorë e gjyqtarë, të mbyllur në një zyrë për të përndjekur kryeministreshën e tij heroinë. Ky narkonjeri.

Në raportet e kësaj dekade, pastrimi i parave në Shqipëri ka shënjestruar shtigjet e ofruara nga qeverisja, në krye të së cilës është Edi Rama.

Ka pastruar me Charles, me biznese dhe me gjobëvënie?

Me inceneratorët?

Me portet?

Me tunelet, Llogarën, Rrugën e Arbërit?

Me anijet bangladeshase të energjisë në Vlorë?

Me tenderët e rrugëve dhe të energjisë?

Me investitorët strategjikë nga bota e trafikut të drogës?

Pastron me rusë, me kinezë, duke dalë nga boshti i NATO-s?

Pa lënë mënjanë tenderët për vendet arabe dhe kompani izraelite, të cilat më shumë shërbejnë për lobingje në favor të Ramës, por marrin biznese të dedikuara nën hyqmin e kryeministrit. A janë zbardhur hetime në këto pirgje parash publike?

Janë afro 12 miliardë euro në filtër hetimi, të kavërdisura nga duart e të pandehurve të qeverisë.

A është hetuar Olsi për pastrim parash, pasi është përmendur gjatë në dosjen e laboratorit të kokainës së “Xibrakës”? Një dosje e nxehtë gjermane, e dekonspiruar në Tiranë dhe e shkatërruar me mosveprime hetimore për shkak të këtyre emrave?

Dhe si person i lidhur, sipas ligjit antimafia, për këtë duhet të kishte përfunduar një hetim edhe për Edi Ramën.

Investimet strategjike të trafikantëve të kokainës dhe koncesionet, shumëkatëshet e emrave të botës së krimit, lejet e të cilëve kanë kaluar nga firma e kryeministrit, a janë hetuar për pastrim parash? Dhe cili është vendi i Ramës në përgjegjësinë penale?

Po organizata kriminale AKSHI, me akuzë zyrtare nga SPAK, qarkulluese e qindra milionë eurove dhe e të dhënave të sigurisë kombëtare, ku përmendet edhe familja e kryeministrit, a ka një hetim alarmues për pastrim apo fshehje parash?

Këtë individ e ka zënë peng mafia. Ai nuk ikën dot nga kanosjet e saj. Edhe ministresha ish-zëvendëse ka material shantazhues ndaj tij.

Dhe turfullimi i tij është shpërthyer si pasojë ndaj gjithkujt. Në mbledhjet e grupit, mediat sjellin copëza të kanosjes ndaj të vetëve, ndërsa u ulëriste:
“Ju jeni askushi. Po ika unë, PS shkon për lesh. Unë ju mbaj në pushtet prej katër mandatesh. Kush më del kundër do ta sakatoj.”

Pa harruar 25 videot e zyrës së infrastrukturës dhe energjisë, të gatshme për të shpërthyer nëpër media nëse kryeministri lëkundet nga mbrojtja ndaj të pandehurve. Apo shtëpinë e përditshme “shitna sot”, e të tjera në rrugë për të bërë transparencën në përballjen luftarake të Ramës me drejtësinë.

Dhe ajo çka Rama shprehu edhe në shfajësimin ndaj Ballukut ishte thika në fytin e dëshmitares, duke dekonspiruar pjesë të përgjimeve të SPAK. Thika e vënë në fyt dëshmitares nga e pandehura, për të mundësuar ndërrimin e dëshmisë në favor të saj.

Ajo thikë është edhe në fytin e Ramës. Ndoshta janë edhe duar bandash të krimit të organizuar, siç po hetohet, që bashkë me të pandehurën ia zmadhojnë Ramës thikën dhe frikën.