Korça “pushtohet” nga policët e rrugores

Qyteti i Korçës është përfshirë nga një prani e shtuar e policisë rrugore, duke sjellë reagime të forta në opinionin publik dhe rrjetet sociale.

Debati u nxit pas një reagimi të gazetarit Xhensil Shkembi, i cili e përshkroi situatën si të pazakontë dhe shqetësuese, duke e krahasuar qytetin me një zonë të militarizuar.

Sipas tij, vetëm në aksin Korçë–Pogradec janë vendosur deri në pesë postblloqe në rreth 40 kilometra rrugë. Ai pretendon gjithashtu se forcave vendore u janë shtuar efektivë nga Tiranë, të pajisur me radarë, dronë dhe patrulla civile.

Në reagimin e tij, Shkembi ngre shqetësimin për një qasje që, sipas tij, është më shumë ndëshkuese sesa parandaluese ndaj drejtuesve të mjeteve, duke përmendur gjoba të shpeshta dhe kontrolle intensive.

Ai paralajmëron se kjo klimë mund të krijojë perceptimin e një “shtetrrethimi”, duke ndikuar negativisht edhe në turizëm, në një kohë kur Korça mbetet një nga destinacionet më të frekuentuara në juglindje të vendit.

Deri në këto momente, Policia e Shtetit nuk ka dhënë një reagim zyrtar lidhur me këto pretendime. Ndërkohë, pritet që autoritetet të sqarojnë arsyet e shtimit të kontrolleve në këtë aks rrugor.

Situata ka hapur një debat më të gjerë mbi balancën mes forcimit të sigurisë rrugore dhe mënyrës se si perceptohen këto masa nga qytetarët dhe vizitorët.