Dyshohet për vrasje me motive pronësie

Një ngjarje e rëndë ka tronditur qytetin e Pogradecit mëngjesin e sotëm, ku një grua 52-vjeçare, Kozeta Teço, u gjet e pajetë në banesën e saj në lagjen nr. 1, e cila ishte përfshirë nga flakët.

Fillimisht u mendua se bëhej fjalë për një aksident tragjik, por hetimet e para kanë ndryshuar drejtimin e çështjes. Burime nga grupi hetimor konfirmojnë se zjarri në banesë dyshohet të jetë i qëllimshëm dhe ngjarja ka shumë gjasa të jetë kriminale.

Sipas ekspertëve mjeko-ligjorë, në trupin e viktimës janë konstatuar shenja të jashtme dhune, çka përforcon dyshimet se 52-vjeçarja është vrarë përpara se banesa të përfshihej nga flakët.

Aktualisht, pista kryesore e hetimit është ajo e vrasjes për motive pronësie, ndërkohë që Policia e Pogradecit dhe grupi hetimor kanë nisur mbledhjen e provave dhe marrjen në pyetje të personave të afërt me viktimën.

Ngjarja ka tronditur banorët e zonës, të cilët shprehen të shokuar dhe kërkojnë zbardhjen sa më të shpejtë të rastit dhe vënien para drejtësisë të autorit apo autorëve të kësaj vepre makabre.