Kryemadhi: Do dalin mesazhet, unë me Ramën ia kemi futur Metës

Pas përfundimit të një seance paraprake në SPAK, ish-deputetja Monika Kryemadhi foli për mediat lidhur me hetimet dhe ekspertizën që po zhvillohet nga prokuroria.

Kryemadhi u shpreh se në kuadër të hetimit do të verifikohen edhe komunikimet e saj me kryeministrin Edi Rama, duke përmendur konkretisht mesazhe që, sipas saj, datojnë që nga viti 2014.

Sipas ish-deputetes, ekspertiza do të përfshijë një analizë të gjerë të komunikimeve dhe zhvillimeve politike të asaj periudhe.

Gjatë deklaratës së saj para mediave, ajo bëri edhe një koment lidhur me procesin politik që çoi në zgjedhjen e Erion Veliaj si kryetar i bashkisë së Tiranë.

“Do t’i shohim të gjitha, edhe mesazhet. Do shohim edhe si e kemi zgjedhur Erion Veliajn kryetar bashkie. Ia kemi futur Ilir Meta sepse ai donte Blendi Klosi, ndërsa unë doja Erion Veliajn”, u shpreh Kryemadhi.

Deklaratat e saj vijnë në një moment kur hetimet e SPAK ndaj figurave të njohura politike vijojnë të jenë në fokus të opinionit publik dhe të debatit politik në vend.