Kush është Arbër Muça, të cilit iu konfiskuan 1.8 milionë euro pasuri

Prokuroria e Fierit ka finalizuar një tjetër goditje ndaj pasurive me origjinë të dyshuar kriminale, duke konfiskuar asete me vlerë rreth 1.8 milionë euro në pronësi të Arbër Muçës. Vendimi erdhi pas një hetimi të thelluar financiar, i cili evidentoi një diferencë të ndjeshme mes të ardhurave të ligjshme dhe pasurisë së krijuar ndër vite.

Sipas analizës financiare, subjekti nuk justifikonte burimin e pasurive që zotëronte, ndërsa një pjesë e tyre dyshohet se ishte regjistruar në emër të personave të tjerë për të fshehur pronësinë reale dhe origjinën e fondeve.

Në bazë të vendimit të gjykatës janë konfiskuar disa pasuri të paluajtshme në Fier dhe Tiranë, përfshirë njësi banimi, truall, apartament dhe vendparkim. Mes tyre spikat një objekt dykatësh me sipërfaqe ndërtimi mbi 600 m², si dhe prona të tjera në zona të ndryshme të Fierit dhe kryeqytetit.

Paralelisht, janë sekuestruar edhe 12 automjete, ku përfshihen mjete luksoze dhe modele të njohura si Lamborghini Urus, Mercedes-Benz G63 AMG, Audi RS Q8 dhe Audi S8, si dhe disa automjete të tjera të kategorive të ndryshme.

Po ashtu, janë konfiskuar edhe disa llogari bankare në euro dhe lekë, me balanca të konsiderueshme monetare, të cilat dyshohet se lidhen me aktivitetin e paligjshëm të subjektit.

Autoritetet bëjnë me dije se hetimet vijojnë për të verifikuar burimin e plotë të pasurisë dhe për të evidentuar lidhje të mundshme me aktivitete kriminale, ndërsa theksojnë se goditja e aseteve të paligjshme mbetet një nga instrumentet kryesore në luftën kundër krimit të organizuar dhe pastrimit të parave.