Kushtetuesja ktheu Veliajn në detyrë, reagon kryeministri Rama

Kryeministri Edi Rama ka reaguar pas vendimit të Gjykatës Kushtetuese, e cila rrëzoi Qeverinë dhe riktheu Erion Veliajn në krye të Bashkisë së Tiranës.

Në një postim në X, Rama thekson se:

“Nëse Tirana nuk do të ketë zgjedhje deri në 2027 dhe Kushtetuesja mendon se kryebashkiaku i burgosur nuk mund të largohet përveçse me zgjedhje, atëherë mbajtja e tij në qeli krijon një disproporcion që dëmton jo vetëm të drejtat kushtetuese të individit, por edhe të drejtën e qytetarëve të kryeqytetit për të qenë të përfaqësuar.”

Kryeministri nënvizon rëndësinë e gjetjes së një zgjidhjeje për këtë situatë, duke theksuar se kryeqyteti nuk mund të mbetet i paqeverisur për një periudhë të gjatë.

Reagimi i Ramës

Disa rrjedhime logjike nga vendimi i Gjykatës Kushtetuese:

1. Ja që edhe njëherë u provua se nuk i paskam kapur unë të tëra pushtetet dhe kjo është një gjë sa e qartë, aq edhe e mirë apo jo

2. Nëse Tirana nuk do të ketë zgjedhje deri në 2027-ën dhe Kushtetuesja mendon se kryebashkiaku i burgosur i Tiranës nuk mund të largohet përveçse me zgjedhje, atëherë disproporcioni i mbajtjes së tij në qeli nuk është më thjesht në dëm të lirive e të drejtave kushtetuese të personit, po edhe në dëm të së drejtës kushtetuese të popullit të kryeqytetit për t’u shërbyer nga i zgjedhuri i vet apo jo

3. Çdo njeri normal që nuk sheh tek qëndrimi i Kushtetueses një qëndrim të verbër kundër qeverisë në dëm të madh të Tiranës, po një qëndrim të vendosur parimor, nuk ka se si të mos presë që me të njëjtën parimësi, kur të gjykojë paraburgimin e tij, Kushtetuesja ta kthejë Erion Veliajn në detyrë, për të vijuar procesin gjyqësor në gjendje të lirë apo jo

Pika 1 dhe 2 janë të sigurta, pika 3 mbetet për t’u parë, ndërkohë le të urojmë që kushdo ka në dorë ta ndihmojë zgjidhjen e këtij ngërçi absurd, të kujtohet se kryeqytetu nuk mund të trajtohet si jetim, për vite me radhë.