La dy fëmijët për të takuar 14-vjeçaren, arrestohet shqiptari në Britani

Një 32-vjeçar shqiptar, i identifikuar si Ardjan, ka rënë në prangat e policisë në Birmingham nga autoritetet e West Midlands, pas dyshimeve për një sërë veprash të rënda penale që lidhen me sjelljen ndaj të miturve dhe neglizhencën prindërore.

Sipas burimeve zyrtare, arrestimi u realizua në kuadër të një operacioni të organizuar me mbështetjen e grupeve të specializuara që monitorojnë dhe identifikojnë persona të dyshuar për ngacmime seksuale ndaj të miturve në internet. Dyshohet se 32-vjeçari kishte komunikuar në rrjete sociale me një vajzë 14-vjeçare dhe ishte larguar nga banesa për ta takuar atë.

Hetimet paraprake kanë nxjerrë në pah se ai kishte lënë pa mbikëqyrje dy fëmijët e tij të vegjël, të moshave një dhe gjashtë vjeç, në banesën ku jetonin. Sipas raportimeve, ambienti ku ndodheshin të miturit është konstatuar në kushte të rënda higjienike, çka përbën një tjetër element rëndues në çështje.

Ndaj 32-vjeçarit rëndojnë akuza serioze, përfshirë organizimin e aktiviteteve seksuale dhe tentativa për përfshirje në marrëdhënie të papërshtatshme, duke e komplikuar më tej situatën e tij ligjore.

Pamjet e publikuara nga momenti i arrestimit tregojnë se i dyshuari ka kundërshtuar ndërhyrjen e policisë dhe ka shfaqur sjellje agresive, ndërsa efektivët u kanë kërkuar personave të pranishëm të qëndrojnë në distancë për arsye sigurie.

Ngjarja ka ngjallur reagime të shumta në rrjetet sociale dhe në mediat britanike, duke rikthyer në vëmendje problematika të ndjeshme si mbrojtja e fëmijëve në hapësirën online, përgjegjësia prindërore dhe rreziqet që lidhen me komunikimet në internet.

Procesi gjyqësor ndaj 32-vjeçarit ka nisur, ndërsa autoritetet britanike pritet të bëjnë publike detaje të tjera në vijim të hetimeve dhe gjatë seancave gjyqësore.