Mbledhja e Përgjithshme e Gjyqtarëve caktohet më 25 shtator 2026

Gjykata e Lartë ka mbyllur një nga fazat më të rëndësishme të procesit për rinovimin e Këshillit të Lartë Gjyqësor, duke shpallur listën përfundimtare të kandidatëve që kanë kaluar verifikimin e kritereve ligjore.

Procesi u hap zyrtarisht më 26 qershor 2026 dhe synon përzgjedhjen e tre anëtarëve të rinj në KLGJ, konkretisht: një përfaqësues nga gjykatat e shkallës së parë, një nga gjykatat e apelit dhe një nga radhët e gjyqtarëve të Gjykatës së Lartë.

Pas shqyrtimit të dokumentacionit dhe verifikimit sipas përcaktimeve të ligjit nr. 115/2016 “Për organet e qeverisjes së sistemit të drejtësisë”, janë kualifikuar kandidatët që plotësojnë të gjitha kushtet për të vijuar në fazën e zgjedhjes.

Kandidatët që kaluan verifikimin janë:

• Arbena Ahmeti – Gjykata e Lartë
• Sandër Simoni – Gjykata e Lartë
• Igerta Hysi – Gjykata e Posaçme e Apelit për Korrupsionin dhe Krimin e Organizuar
• Fatri Islamaj – Gjykata e Apelit të Juridiksionit të Përgjithshëm Tiranë
• Matilda Llangozi – Gjykata e Shkallës së Parë të Juridiksionit të Përgjithshëm Tiranë
• Brunilda Kadi – Gjykata e Shkallës së Parë të Juridiksionit të Përgjithshëm Tiranë
• Manjola Xhaxho – Gjykata e Shkallës së Parë të Juridiksionit të Përgjithshëm Tiranë

Ndërkohë, Kryetari i Gjykatës së Lartë, Sokol Sadushi, ka përcaktuar edhe datën kur do të zhvillohet votimi. Mbledhja e Përgjithshme e Gjyqtarëve është thirrur për më 25 shtator 2026, në orën 10:00, ku do të bëhet përzgjedhja përfundimtare e anëtarëve të rinj të KLGJ-së.

Ky proces konsiderohet kyç për funksionimin dhe balancën e sistemit të drejtësisë, pasi KLGJ luan rol vendimtar në emërimet, vlerësimet dhe disiplinimin e gjyqtarëve në vend.