Makina përplas 57-vjeçaren, largohet me shpejtësi nga vendngjarja

Një aksident rrugor është regjistruar në rrugën Transballkanike në Vlorë, ku një automjet ka përplasur një grua rreth 57 vjeç, teksa ajo po kalonte në vijat e bardha.

Sipas dëshmitarëve në vendngjarje, mjeti ka qenë duke lëvizur me shpejtësi dhe nuk ka ndaluar, duke e goditur qytetaren në momentin që po kalonte rrugën.

Pas përplasjes, drejtuesi i automjetit është larguar menjëherë nga vendi i ngjarjes, duke e braktisur mjetin në rrugë. Mësohet se makina ka mbetur e ndezur, ndërsa identiteti i shoferit nuk është bërë ende i ditur nga autoritetet.

E dëmtuara ka pësuar lëndime, kryesisht në njërën këmbë, dhe është transportuar me urgjencë drejt spitalit rajonal të Vlorës, ku ndodhet nën kujdesin e mjekëve.

Policia ka nisur hetimet për zbardhjen e plotë të rrethanave të aksidentit dhe për identifikimin e drejtuesit të mjetit, i cili u largua nga vendngjarja.