Ja si u kryqëzuan në SPAK rrugët e miqve të dikurshëm

Monika Kryemadhi ka qenë sot në qendër të vëmendjes së lajmeve në Shqipëri. Edhe pse ka mohuar të gjitha akuzat e Prokurorisë së Posaçme, zonja Kryemadhi nuk e fshehu një gabim që e pranon vetë: përzgjedhjen e Erion Veliajt si kandidat për kryetar të Bashkisë së Tiranës.

“Bashkë me Edi Ramën punuam pas shpinës së Ilir Metës. Caktuam Erjon Veliajn kandidat për Bashkinë e Tiranës. Mu thaftë goja edhe dora,” tha ajo, duke pranuar para gazetarëve se në celularin e sekuestruar nga SPAK në shtëpinë e nënës së saj kishte mesazhe me Ramën, të cilat vërtetojnë bashkëpunimin e tyre në kohët kur qeverisnin së bashku dhe vendosën kandidaturën për Tiranën. Kryemadhi ka qenë ndër kritiket më të ashpra të projektit të inceneratorit të Tiranës dhe e ka akuzuar Veliajn si përgjegjësin kryesor për këtë aferë të ashtuquajtur “afera e shekullit”. Shigjetat e saj janë drejtuar më së shumti ndaj Veliajt, ndoshta edhe për faktin se ai, i përzgjedhuri i saj, e ka luftuar Kryemadhin në mënyrë sistematike vitet e fundit.

Për ironi, edhe Veliaj është aktualisht nën hetim nga SPAK për çështjen e inceneratorit të Tiranës, si dhe për pasurinë e tij dhe të familjes. Kjo na çon të mendojmë se ish-miqtë e dikurshëm dhe armiqtë e sotëm, mes marrëveshjeve dhe konflikteve të shumta ndër vite, kanë tani një pengesë të përbashkët: SPAK-un. Kjo strukturë ka sot përgjegjësinë të tregojë qartësi dhe vendosmëri në vendimet e saj, pa u ndikuar nga mesazhet dhe nga mënyra aspak normale se si është bërë karriera politike në Shqipëri. Është e domosdoshme që të vendoset drejtësi, që të paktën e ardhmja e këtij vendi të mos përcaktohet në mënyrë të padenjë dhe banale, por të shkojë drejt një shoqërie që meriton më shumë se kaq!