‘Më jep 60 mijë lekë, të nxjerr makinën’, arrestohet polici në Durrës

Një punonjës policie është arrestuar nga Agjencia e Mbikëqyrjes Policore (AMP) në Durrës me akuzën e korrupsionit. Polici i kërkoi një shumë prej 60 mijë lekësh të reja një qytetari për të nxjerrë automjetin nga pika e bllokimit dhe për të shmangur vendosjen e masës administrative.

Sipas njoftimit të AMP, arrestimi u realizua në bashkëpunim me SPAK, dhe gjatë operacionit u sekuestruan paratë e futur brenda një zarfi, të cilat do të shërbejnë si provë materiale.

“Agjencia e Mbikëqyrjes Policore (Rajoni Durrës – Kavajë), në bashkëpunim me Prokurorinë e Posaçme Kundër Korrupsionit dhe Krimit të Organizuar, ka arrestuar në flagrancë punonjësin e policisë G. H., me detyrë Trupë Shërbimi i Trafikut Urban dhe Interurban në DVP Durrës, i dyshuar për kryerjen e veprës penale ‘Korrupsion pasiv i personave që ushtrojnë funksione publike’, parashikuar në nenin 259 të Kodit Penal”, thuhet në njoftim.

Arrestimi u realizua pas veprimeve me metoda speciale të hetimit, ku u provua se polici, duke shfrytëzuar funksionin e tij, i kishte kërkuar dhe marrë shtetasit E.S. shumën prej 60,000 lekësh të reja, duke premtuar të mos aplikonte masën administrative dhe të nxirrte automjetin nga pika e bllokimit.

AMP njofton se vijojnë hetimet në bashkëpunim me SPAK për të përcaktuar përfshirjen e mundshme të personave të tjerë në këtë veprimtari kriminale.