Përditësuar më 24 Qershor 2026, 13:48

Tedi Blushi ‘molla e sherrit’

Në Gjykatën e Posaçme Kundër Korrupsionit dhe Krimit të Organizuar (GJKKO) vijon seanca në themel për kreun e Partisë së Lirisë, Ilir Meta, dhe ish-deputeten Monika Kryemadhi, ku nuk kanë munguar tensionet dhe përplasjet e drejtpërdrejta mes tyre.

Gjatë seancës, Meta deklaroi se nuk ka asnjë dijeni mbi veprimet apo komunikimet e Kryemadhit, duke theksuar se nuk është i përfshirë në asnjë prej çështjeve që lidhen me emrat e përmendur në dosje. Ai mohoi kategorikisht çdo kontakt apo ndikim ndaj personave të përfshirë, përfshirë edhe komunikimet e pretenduara me ta.

“Nuk ekziston asnjëlloj ndikimi për Adrian Shatkun. As për askënd tjetër. Asnjë SMS për Monika Kryemadhin, Piro Xhixhon. Edhe një interes që mund të ishte i ligjshëm. As me Theodhori Çamin, që e ka mbiemrin Çami, po ka therur çamë. Kjo është histori UDB-je, edhe Adrian Shatku duhet të kishte ardhur këtu sapo dëgjoi emrin, se ka ngrënë bukë në shtëpinë time. Adrian Shatku u largua në 1989, e mori UDB-ja, pastaj iku në Amerikë. Kjo është histori UDB-je dhe agjenturash greke. Nuk kam asnjë dijeni për veprimet e Monika Kryemadhit, i di vetë ajo. Ato historitë e mesazheve i di zonja Kryemadhi,” deklaroi ai.

Deklaratat e Metës u kundërshtuan menjëherë nga Kryemadhi, e cila reagoi ashpër, duke e akuzuar se po mbështetet në informacione të pabazuara dhe thashetheme.

“Boll se nuk është ashtu. Me llafet që të sjell Altin Dumani, thashetheme flet këtu. Mos u merr me llafe grash. Akoma merresh me thashethemet e Tedi Blushit?”, u shpreh ajo.

Tensioni në sallë u rrit më tej kur Kryemadhi iu drejtua drejtpërdrejt Tedi Blushit, i pranishëm në seancë, duke shpërthyer në akuza dhe paralajmërime.

“Kam 4 vjet që e dëgjoj dhe e duroj. Edhe babai im të çohet nga varri, nuk e duroj dot më. Do të t’i lexoj dhe unë mesazhet ty, të marrësh vesh. Me llafet e këtij rrogëtari merresh ti?”, tha Kryemadhi.

Përplasja verbale detyroi ndërhyrjen e trupit gjykues, i cili paralajmëroi palët për ruajtjen e rendit dhe etikës në sallën e gjyqit.

“Do ju nxjerr nga salla e gjyqit. Paralajmërojmë të pandehurën Monika Kryemadhi, nëse e përsërisni, do largoheni nga seanca dhe do gjobiteni,” u shpreh gjykata.

Seanca u shoqërua me tensione të forta, duke reflektuar përplasjet e thella mes palëve në këtë proces gjyqësor me interes të lartë publik.