Ministrja e mbrojtjes ishte në bord, avionit spanjoll i ndodh e papritura

Një avion ushtarak spanjoll, me ministren e mbrojtjes Margarita Robles në bord, pësoi një “defekt” në sistemin e GPS-it të mërkurën, ndërsa fluturonte mbi enklavën ruse të Kaliningradit, njoftoi qeveria e Spanjës.

Avioni A330 ishte në rrugë për në Lituani atë mëngjes dhe incidenti ndodhi gjatë kalimit mbi Kaliningrad, sipas Ministrisë së Mbrojtjes së Spanjës. Ministrja Robles po udhëtonte drejt bazës ajrore Siauliai në Lituani, e cila është pjesë e misionit të policisë ajrore të NATO-s. Në bord ndodheshin edhe të afërm të trupave spanjollë të vendosur në bazë, si dhe gazetarë, raportuan mediat lokale.

Përpjekja e dukshme për të prishur funksionimin e GPS-it nuk ndikoi në fluturim, pasi aeroplani përdor një sinjal të satelitit ushtarak, sipas gazetës spanjolle El Mundo.

Që nga fillimi i pushtimit të plotë rus në Ukrainë në shkurt 2022, janë regjistruar dhjetëra incidente të ngjashme, të cilat zyrtarët perëndimorë i atribuojnë Rusisë.

Gjatë këtij viti, vendet nordike dhe baltike, përfshirë Estoninë, Finlandën, Letoninë dhe Lituaninë, kanë paralajmëruar vazhdimisht për rritjen e ndërhyrjeve elektronike nga Rusia, të cilat synojnë të prishin komunikimet me aeroplanë, anije dhe dronë.

Ndërsa Moska pretendon se këto bllokime janë masa mbrojtëse për të ruajtur qytetet dhe infrastrukturën ushtarake nga sulmet me dronë ukrainas, zyrtarët baltikë paralajmërojnë se thellësia dhe shtrirja e ndërhyrjeve elektronike po rritet, duke shkaktuar dështime të navigimit edhe larg kufijve rusë.