Momente paniku, zyrtari humb ndjenjat në Shtëpinë e Bardhë

Momente paniku janë shënuar sot në Zyrën Ovale të Shtëpisë së Bardhë, gjatë një konference për shtyp ku Presidenti Donald Trump po njoftonte uljen e çmimeve të ilaçeve kundër obezitetit.

Një përfaqësues i një kompanie farmaceutike, që ndodhej pas David Ricks, drejtorit ekzekutiv të kompanisë “Lilly”, humbi ndjenjat dhe u rrëzua papritur në tokë, duke krijuar alarm në mes të transmetimit.

Pamjet tregojnë momentin kur dy persona pranë tij nxitojnë për ta mbajtur, ndërsa Dr. Mehmet Oz, administrator i Qendrave për Shërbimet Medicare dhe Medicaid, u afrua menjëherë për ta ndihmuar.

Në atë moment, Presidenti Trump qëndronte ulur në tryezën “Resolute”, i habitur nga ngjarja, ndërsa gazetarët dhe fotografët u nxorën menjëherë nga dhoma për t’i lënë vend personelit mjekësor të Shtëpisë së Bardhë.

Pas disa minutash, Sekretarja e Shtypit, Karoline Leavitt, njoftoi se personi ishte në gjendje të mirë dhe kishte marrë kujdesin e duhur mjekësor. Ajo konfirmoi se konferenca do të rifillonte menjëherë.

Trump, duke reaguar pas incidentit, tha me qetësi:

“Ishte vetëm një ndërprerje e vogël. Jam i lumtur që ai është mirë.”

Pas ndërprerjes, presidenti rifilloi fjalën për programin e ri të administratës që synon uljen e çmimeve të ilaçeve për humbje peshe, për t’i bërë ato më të përballueshme për qytetarët amerikanë.