“Na rrahën me shkopinj e shkelma”, dëshmia tronditëse e 15-vjeçarit

Një dëshmi e një të mituri hedh dritë mbi atë që pretendohet se ka ndodhur brenda ambienteve të Ministrisë së Arsimit gjatë protestave të së mërkurës në Tiranë. A.P., 15 vjeç, nxënës i shkollës “Petro Nini Luarasi”, rrëfen se si përfundoi i izoluar në një nga dhomat e institucionit, së bashku me rreth 20 persona të tjerë, shumica nxënës shkolle.

Sipas tij, ai nuk ishte pjesë e grupit që hyri në ministri, por u dërgua brenda godinës nga policia. Në dëshminë e tij, i mituri pretendon se efektivët i urdhëruan të shtriheshin në dysheme dhe më pas i goditën me shkelma e shkopinj.

“Na ulëritën të shtriheshim në tokë”

15-vjeçari tregon se ngjarja ndodhi në një ambient në pjesën e pasme të Ministrisë së Arsimit, pranë vendit ku ishin parkuar furgonat e policisë. Sipas rrëfimit të tij, aty ndodheshin rreth 20 persona, thuajse të gjithë nxënës, ndërsa vetëm dy ose tre prej tyre ishin më të rritur.

“Dhoma ishte si sallë, në Ministrinë e Arsimit, nga pjesa e pasme, ku ishin furgonat e policisë. Ishim rreth 20 veta. Të gjithë ishim nxënës. Vetëm dy-tre ishin të mëdhenj. Një nga policët me xhupa të kuq na ulëriti të shtriheshim në tokë. Pastaj na rrahën me shkelma dhe shkop. Disa që rezistuan i gjakosën fare”, rrëfen A.P.

Sipas dëshmisë së tij, të rinjtë u mbajtën të shtrirë në dysheme për një periudhë që ai e përllogarit nga 30 minuta deri në një orë. Më pas, ata u transportuan me furgona drejt komisariatit.

Videoja virale, 15-vjeçari pretendon se u filmua nga një polic me maskë

Një tjetër detaj që nxënësi sjell në dëshminë e tij lidhet me videon e shpërndarë gjerësisht në rrjetet sociale, ku shfaqen të rinj të shtrirë në dyshemenë e një ambienti të brendshëm.

A.P. pretendon se pamjet nuk janë filmuar nga një person i jashtëm, por nga një efektiv policie që ndodhej pranë tyre. Sipas tij, personi që regjistroi skenën ishte i maskuar dhe qëndronte shumë pranë vendit ku ai ishte shtrirë.

“E bëri mbi kokën time. Ishte polic me maskë”, tregon 15-vjeçari.

Dëshmia e të miturit ngre pikëpyetje mbi mënyrën se si u trajtuan të rinjtë e shoqëruar gjatë protestës dhe rrethanat në të cilat u filmuan pamjet që më pas qarkulluan në internet.

Pretendimet e tij për dhunë fizike dhe përfshirjen e efektivëve në regjistrimin e videos kërkojnë verifikim nga autoritetet përkatëse. Deri në konfirmimin e pavarur të rrethanave, ato mbeten pjesë e dëshmisë së 15-vjeçarit për ngjarjen brenda Ministrisë së Arsimit.