Nafta ‘fluturon’ në 230 lekë/litër, Vlorë boshatiset nga makinat

Rritja e vazhdueshme e çmimit të naftës në Shqipëri po rëndon çdo ditë e më shumë mbi qytetarët, ndërsa në Vlorë situata duket se ka arritur një pikë kritike. Banorët e qytetit bregdetar po përballen drejtpërdrejt me koston e lartë të karburantit, e cila po ndikon dukshëm në përditshmërinë e tyre.

Pamjet e fundit të siguruara nga qyteti tregojnë një realitet ndryshe nga ai i zakonshmi: rrugë që më parë gumëzhinin nga lëvizja e automjeteve, sot shfaqen të qeta dhe pothuajse të boshatisura. Sipas dëshmive të qytetarëve, çmimi i naftës ka kapur nivelin e 230 lekëve për litër, duke e bërë përdorimin e makinave një luks për shumë familje.

Në mungesë të masave konkrete për frenimin ose stabilizimin e çmimeve, një pjesë e mirë e drejtuesve të automjeteve duket se kanë zgjedhur të kufizojnë lëvizjet ose të heqin dorë përkohësisht nga përdorimi i tyre. Kjo situatë po reflektohet drejtpërdrejt në trafikun e reduktuar, duke i dhënë qytetit një pamje të pazakontë për këtë periudhë.