Në lojën e xhunglës politike fiton vetëm “mbreti” Çyrbjet, bëhen “kurban”

Largimi i Jurgis Çyrbjes nga Kuvendi është një tjetër shembull i mekanizmit të pamëshirshëm me të cilin Edi Rama menaxhon pushtetin e tij. Çyrbja, një ish-deputet socialist i cili shërbeu me dy mandate në qarkun e Durrësit, është akuzuar për shpërdorim detyre gjatë kohës kur drejtonte Zyrën e Regjistrimit të Pasurive të Paluajtshme në këtë qytet. Dorëzimi i tij i mandatit, vetëm dy ditë pas marrjes në pyetje nga SPAK, tregon qartë se heqja dorë nuk ishte një vendim vullnetar, por i diktuar nga një strukturë politike që kontrollon gjithçka me një dorë të hekurt.

Edi Rama është një mjeshtër i kalkulimeve politike dhe në këtë rast, si shumë herë të tjera, ai bëri një zgjedhje të thjeshtë: Çyrbja ishte i ndotur dhe nuk ia vlente të ruhej më. Por, e habitshme është sesi ai i shërbeu për vite të tëra Partisë Socialiste, madje dhe kur ishte ekspozuar publikisht në përgjime me grupin famëkeq të Emiljano Shullazit. Atëherë, Rama e mbrojti, por këtë herë, për arsye ende të paqarta, e braktisi. Çyrbja u bë kështu viktima e radhës e strategjisë së Ramës, e cila ndjek një model të qartë: mbaje besnikun për aq kohë sa i nevojitet, pastaj flake atë kur përfitimet përfundimtare përballen me humbjen e votave apo perceptimit publik.

Kjo taktikë nuk është e re për Ramën. Mjafton të kujtojmë se si ai la të rrëzohej një tjetër eksponent socialist, Rrahman Rraja, kur presioni për abuzimet e tij u bë i padurueshëm. Të njëjtën gjë bëri edhe me Lefter Kokën, ish-ministrin që dikur ishte pjesë e LSI-së dhe që më vonë u bë mish për top në aferën e famshme të inceneratorëve. Tani është radha e Çyrbjes, dhe nesër do të vijë radha e një tjetri. Njësoj si në rastin e Alqi Bllakos, Arben Ahmetajt dhe një galerie të tërë personazhesh që dikur ishin në qendër të pushtetit dhe tani janë hedhur mënjanë si të pavlerë.

Po cilat janë arsyet reale pas këtyre largimeve? Rama i përdor këta individë si gurë shahu për të fituar kohë dhe për të mbajtur në këmbë një sistem që i shërben vetëm atij. Teksa zgjedhjet e vitit 2025 afrohen, përplasjet brenda Partisë Socialiste po bëhen gjithnjë e më të egra, dhe kurbanët që po sakrifikohen janë ata që dikur mbanin mbi supe fatin politik të Ramës.

Në vend të Çyrbjes, spekulohet se në skenë do të hyjë një tjetër lojtar politik – Agron Duka, një figurë e njohur nga zona e Shijakut, i cili ka ndërruar aleancat disa herë gjatë karrierës së tij. Kështu, Rama po largon një deputet të kompromentuar për të sjellë në skenë një tjetër, ndoshta më të përdorshëm, në një lojë të pandërprerë të ndërrimeve dhe kalkulimeve që gjithmonë lënë dikë jashtë.

Me sa duket, Edi Rama nuk është thjesht një kryeministër që udhëheq një vend, por një “mbret” i një sistemi ku besnikëria zgjat vetëm aq sa përfitimi politik. Të gjithë janë të zëvendësueshëm dhe, me siguri, Çyrbja nuk do të jetë i fundit. Kjo është një lojë ku vetëm një fiton – dhe ai është gjithmonë vetë Rama. / N N