Nipi i vdiq në aksidentin në Vlorë, daja i Leandros: Vrasje me dashje!

Gjykata e Vlorës ka caktuar masën e sigurisë “arrest në burg” për 32-vjeçarin Hajri Bajramaj, i cili shkaktoi aksidentin tragjik ku humbi jetën 17-vjeçari Leandro Shametaj.

Trupa gjykuese pranoi kërkesën e Prokurorisë së Vlorës, e cila akuzon Bajramajn për veprat penale “Shkelja e rregullave të qarkullimit rrugor” dhe “Drejtimi i automjetit në gjendje të dehur”.

Gjatë seancës gjyqësore, i akuzuari shprehu pendesë për ngjarjen e rëndë dhe kërkoi falje për humbjen e jetës së të miturit.

“Më vjen keq për atë që ka ndodhur, nuk e kam bërë me qëllim”, është shprehur Bajramaj para trupës gjykuese.

Ndërkohë, jashtë ambienteve të gjykatës, familjarët e viktimës 17-vjeçare kërkuan dënim maksimal dhe ashpërsim të ligjit për drejtuesit e mjeteve që shkaktojnë aksidente të tilla.

“Ne kërkojmë drejtësi për Leandron. Ai e mori atë që meritonte, por ligji duhet të ashpërsohet. Të ecësh në bulevard me 200 km/h, i dehur dhe i papërgjegjshëm, kjo është vrasje me dashje,” tha daja i viktimës.

Aksidenti tragjik ndodhi disa ditë më parë në një nga bulevardet kryesore të Vlorës, ku makina që drejtohej nga Bajramaj përplasi për vdekje të riun Shametaj.