“Njoh drejtues institucioni”/ I zhvati 6,300 euro qytetarit, 54-vjeçari arrestohet në Korçë

Një 54-vjeçar nga Korça është arrestuar nga policia vendore dhe specialistët e Hetimit të Krimeve Ekonomike dhe Financiare, pas kallëzimit nga një qytetar 53-vjeçar për mashtrim.

Sipas policisë, i arrestuari, Ilir Zisko, i premtonte qytetarit se do t’i zgjidhte një çështje administrative duke përdorur njohjet e tij me drejtues të institucioneve shtetërore. Në këtë mënyrë, 53-vjeçari i ka dhënë disa këste, në total 6,300 euro, gjatë katër muajve të fundit.

Njoftimi i Policisë

Korçë

I mori 6300 euro, një shtetasi, nëpërmjet mashtrimit, vihet në pranga 54-vjeçari.

Specialistët për Hetimin e Krimeve Ekonomike dhe Financiare, pas kallëzimit nga një 53-vjeçar, se një shtetas i kishte marrë disa herë para, duke i premtuar se do ta ndihmonte me anë të njohjeve që kishte me disa drejtues të insitucioneve shtetërore, kanë kryer veprimet hetimore për rastin dhe kanë vënë në pranga shtetasin:

I. Z. 54 vjeç, banues në Korçë.

Ky shtetas dyshohet se gjatë 4 muajve, i ka marrë 6300 euro, 53-vjeçarit, nëpërmjet mashtrimit.

Materialet procedurale iu referuan Prokurorisë së Korçës, për veprime të mëtejshme, për veprën penale “Mashtrimi”.