Nuk u pëlqeu ngjyra e mjetit, plas sherri në Korçë, 3 të plagosur

Një konflikt i dhunshëm ka përfunduar me tre persona të plagosur mëngjesin e së shtunës, pas një përplasjeje në ambientet e një servisi automjetesh.

Mes të lënduarve ndodhet edhe pronari i biznesit, Renaldo Xhixho, i cili u përfshi drejtpërdrejt në përshkallëzimin e situatës. Sipas informacioneve paraprake, gjithçka nisi disa ditë më parë, kur tre persona kishin dërguar një automjet për lyerje. Ata janë rikthyer sot në servis duke shprehur pakënaqësi për rezultatin e punës së kryer.

Debati mes palëve ka marrë shpejt përmasa të tensionuara, ndërsa situata është përkeqësuar edhe më tej nga fakti se klientët nuk kishin shlyer detyrimin financiar për shërbimin e marrë. Mosmarrëveshja ka degraduar në përplasje fizike, ku gjatë konfliktit është përdorur një mjet prerës, konkretisht një palë gërshërë.

Të tre të plagosurit kanë marrë ndihmë mjekësore, ndërsa rrethanat e plota të ngjarjes janë në proces verifikimi nga autoritetet përkatëse.