Opozita zbarkon sot në shesh, Berisha thirrje për pjesëmarrje masive

Opozita pritet të rikthehet në protestë pasditen e kësaj të shtune, duke thirrur qytetarët në një tubim që do të zhvillohet në orën 18:00. Në qendër të kësaj proteste janë akuzat ndaj qeverisë dhe zhvillimet e fundit në drejtësi, të lidhura me hetimet e nisura nga SPAK.

Çështja që ka ndezur më shumë debat lidhet me ish-zv.kryeministren Belinda Balluku, e cila u largua nga detyra në ndryshimet e fundit në kabinet. Sipas opozitës, hetimet e Prokurorisë së Posaçme përfshijnë akuza të rënda ndaj saj, ndërsa është kërkuar edhe arrestimi.

Gjatë së premtes, strukturat e Partia Demokratike e Shqipërisë zhvilluan takimet e fundit organizative për protestën, ku u përcaktua edhe mënyra e mobilizimit të mbështetësve në këtë tubim.

Kreu i opozitës, Sali Berisha, paralajmëroi më herët se protestat do të marrin forma të ndryshme. “Ne tani kalojmë në forma të ndryshme protestash, i diversifikojmë, kemi kreativitet. Do të eksplorohen forma të reja,” u shpreh ai në një deklaratë për mediat, duke paralajmëruar gjithashtu pjesëmarrje të lartë në tubimin e radhës.

Protesta zhvillohet vetëm pak ditë pasi kryeministri Edi Rama bëri ndryshime në qeveri, duke larguar Belinda Ballukun dhe dy ministra të tjerë, ndërsa riorganizimi preku në total gjashtë poste në kabinet.

Kjo është protesta e katërt që opozita organizon gjatë këtij viti. Kërkesa kryesore e saj mbetet largimi i kryeministrit Edi Rama dhe krijimi i një qeverie teknike, e cila sipas opozitës do të hapte rrugën për mbajtjen e zgjedhjeve të parakohshme në vend.