Padishahu dhe Algoritmi!

Përditësuar më 21 Qershor 2026, 13:36

Naim Noka

Mbreti ynë de fakto, ai që prej vitesh sundon pa rregulla, sapo ka pasuruar fjalorin e tij politik me një shpikje të re: “Proletariati i Algoritmeve Sociale”.

Gjatë takimeve me Byronë e Rilindjes, në vend që të dëgjonte zërin e rrugës, ai zgjodhi të përdorë një fjalor të ri “filozofik”. Duke i etiketuar kritikët dhe protestuesit si një “proletariat algoritmesh”, ai synon të minimizojë revoltën e vërtetë qytetare. Për të, zëri i popullit nuk është dhimbje apo varfëri, por thjesht një reagim mekanik, një histori virtuale e nxitur nga kodet e internetit. Mbreti ynë duket se është dehur e është bërë “dru fare” nga era e algoritmit të vet.

Fushëbeteja Virtuale vs. Realiteti në Shesh

Sipas kësaj logjike mbretërore, algoritmi po kthehet në fushëbetejën kryesore. Në njërin krah qëndron ai, i rrethuar nga shpura e “Byrosë Rilindase”, dhe në krahun tjetër:

 Mijëra të rinj që gdhihen në shesh para zyrës së tij.

 Një qëndresë që vazhdon prej më shumë se 22 ditësh protestë.

Ndërkohë, nga ana tjetër e politikës, doktori i PD-së pret vizën amerikane për të pushuar një javë tek Dajë Semi. Por jashtë zyrave të rehatshme, realiteti flet ndryshe: algoritmi proletar po kthehet në algoritëm kombëtar, o Mbret!

“Flasim” në Podcast, Heshtim para Popullit

Pavarësisht se sheshi zjen nga thirrjet për dorëheqje dhe diaspora rrethon muret e pushtetit, Kryeministri Edi Rama zgjedh ta shohë realitetin nga dritarja e podcast-it të tij “Flasim”. Për të, revolta është thjesht “histeri e algoritmit” dhe “gjysmë të vërteta”.

Me një arrogancë që kalon kufijtë e normales, ai deklaroi se:

“Edhe nëse një planet i tërë do të protestonte, askush nuk mund ta detyrojë Partinë Socialiste të ndihet fajtore.”

Për mbretin, në shesh ka vetëm “iluzione dhe shtrembërime faktesh”. Madje, projekti i debatueshëm i Zvërnecit nuk do të ndalet, sepse sipas tij ai sjell “zhvillim”. Ky është relativizimi perfekt i pakënaqësisë qytetare dhe shmangia absolute e përgjegjësisë politike.

Nëse për 13 vite u ngjite në majat e abuzimit me pushtetin personal dhe privat, ka ardhur koha të zbresësh poshtë. Kambanat po bien për kokën tënde dhe për sistemin e korruptuar që ngrite hap pas hapi.

Një këshillë miqësore: Kujdes mos të rrëshqasin atletet kur të zbresësh, se vidhisesh shumë keq o mbret!

Aman se po ike ti, kush do të abuzojë kaq shumë me popullin më të varfër, në vendin me natyrë dhe resurse më të pasura në Europë?