Serbët i vranë të atin në gjenocidin ndaj shqiptarëve të Kosovës

Ditën e djeshme, në 27-vjetorin e Masakrës së Reçakut, edicionet informative rikthyen në kujtesë një nga plagët më të rënda të historisë sonë kombëtare – gjenocidin serb ndaj shqiptarëve të Kosovës. Një tragjedi që, edhe pas kaq vitesh, mbetet e paharrueshme dhe e gjallë në ndërgjegjen e popullit shqiptar.

Dhimbja vijon të jetë e pranishme, e pashuar dhe e trashëguar brez pas brezi.

Këtë ndjesi e përcolli në mënyrë thellësisht prekëse prezantuesja e Edicionit Qendror të lajmeve në RTK, Vlora Fetoshi, e cila nuk i përmbajti dot emocionet dhe shpërtheu në lot pas transmetimit të kronikave për homazhet në Reçak dhe masakrën e Krushës së Madhe.

Për vite me radhë, Vlora kishte zgjedhur ta mbante në heshtje dhimbjen personale për humbjen e babait të saj, i cili u vra mizorisht nga forcat policore dhe ushtarake serbe gjatë masakrës së Krushës. Një dhimbje e thellë, e jetuar në heshtje, por kurrë e shëruar.

Mbrëmjen e djeshme, gjatë transmetimit të drejtpërdrejtë, kjo heshtje u thye. Lotët e saj nuk ishin vetëm emocione të një prezantueseje, por zëri i një vajze, i një familjeje dhe i mijëra familjeve shqiptare që mbajnë ende mbi supe peshën e krimeve të luftës.

Ajo nuk lexoi thjesht lajme. Ajo solli në ekran dhimbjen kolektive, kujtesën historike dhe plagën që ende rëndon mbi Kosovën dhe mbi ndërgjegjen tonë kombëtare.